Autor: xixonaldia

Un muertu y dos firíos nun accidente de tráficu en Nava

Un varón morrió y dos persones, un varón y una muyer, resultaron mancaes nun accidente de tráficu ente dos vehículos na N-634 n’El Remediu, en Nava. Según los datos facilitaos pol Serviciu d’Atención Médica Urxente (SAMU) les dos persones mancaes fueron treslladaes al Hospital Universitariu Central d’Asturies (HUCA).

El Centru de Coordinación d’Emerxencies recibió l’avisu a les 19:15 hores. Na llamada indicóse que se produxera un choque ente dos turismos y había xente dientro de los coches. Darréu movilizóse al Xefe de Bomberos del Serviciu d’Emerxencies del Principáu d’Asturies (SEPA) de la Zona Centro Esti y a seis efectivos de bomberos de los parques de Piloña y Samartín del Rei Aurelio, que se treslladaron con un vehículu primera salida y dos furgones multisocorro.

Cuando llegaron a la zona, los bomberos comprobaron que los ocupantes d’unu de los vehículos accidentaos taben fuera del mesmu y nel segundu, un turismu, el so ocupante taba muertu. Tres la pertinente autorización, los bomberos escarcelaron el cuerpu ensin vida del varón. Pa ello utilizaron dos equipos d’escarcelación colos que se retiró’l techu del turismu y les puertes llaterales. De siguío fíxose güecu nel salpicadero y dar en la estracción del cuerpu ensin vida del home.

Los bomberos dieron per rematada la intervención a la so llegada a base a les 20:51 hores, nel casu de Piloña, y a les 20:46 hores nel casu de los efectivos de Samartín del Rei Aurelio. La sala del 112 del SEPA informó del sucesu a la Guardia Civil y al Serviciu d’Atención Médica Urxente (SAMU) qu’activó xuna UVI Móvil y l’ambulancia de soporte vital básicu y el médicu de Nava.

18/05/2019
Juan Vázquez: «Celebro qu’otros partíos empiecen a falar de les oportunidaes d’Asturies»

El candidatu de Ciudadanos (Cs) a la presidencia d’Asturies, Juan Vázquez, celebró esti xueves que los mensaxes de la so formación tean empezando a calar y vaigan per delantre na campaña. «Yá veo qu’otros partíos empiecen a falar de les oportunidaes d’Asturies», dixo. Vázquez manifestó amás que la posición de centru de Ciudadanos, «ye agora acobiciada por munchos pero llamentó que sía una posición que revele «poco convencimientu porque son cambeos de fin de selmana».

«Veo tamién un desfile de ministros continuu del gobiernu de Pedro Sánchez per Asturies, aprovechen pa velos agora», aseguró Vázquez, «porque depués nun sé si van volver». Ye l’amuesa del preste y la sumisión” que’l PSOE de Pedro Sánchez n’Asturies tien respectu del Gobiernu Central, añedió’l candidatu de Cs. Y esi sentíu aprovechó pa #preguntar a la Ministra d’Economía, Nadia Calviño, “si la meyor Asturies ye l’Asturies que según los datos qu’apaecieron apocayá, tuvo’l peor rexistru de crecedera económica nos diez últimos años, a lo cabero con una crecedera negativa de 4 puntos y medio, mientres otres comunidaes crecieron el 12, el 10”.

Tamién se quixo referise Vázquez a la Ministra de Sanidá, María Luisa Carcedo, «querdría preguntar si la so dedicación a la campaña n’Asturies déxa-y resolver el problema seriu de desabastecimiento farmacéuticu que tien a munchos asturianos de farmacia en farmacia, buscando melecines fundamentales pa los sos tratamientos». Mentanto, concluyó la cabeza de llista autonómicu de Cs, nós tamos «conociendo l’Asturies real, l’Asturies de les oportunidaes, l’Asturies con capacidá pa xenerar actividá, dinamismu, empléu, que ye lo que precisa esta rexón».

17/05/2019
L’Apocalipsis’ llega a Xixón

Apocalipsis, la cuarta entrega del Circu de los Horrores, llega a Xixóndel 17 al 26 de mayu nuna superproducción nunca vista que va dexar al públicu ensin aliendu y con un mensaxe que nun va dexar indiferente. Trátase d’un show azogosu, brutal ya intensu. Un esplosivu cóctel d’insólitos ingredientes fúndense baxo una xigantesca carpa, nun espectacular escenariu, con música y voces en directu, una técnica visual novedosa y actos circenses de gran magnitú.

Con una inversión de 3.500.000 d’euros, Apocalipsis ye l’espectáculu más grande del Circu de los Horrores, onde casi cien persones de diez nacionalidaes, ente artistes, técnicos y personal de xira, trabayaron mientres dos años. Suso Silva (Premiu Nacional de Circu 2003), director y ceador d’Apocalipsis, ye l’encargáu de dirixir a más de cincuenta artistes llegaos de les meyores escueles de circu de tol mundu, nun xigantescu montaxe en formatu teatral con un escenariu de cuarenta metros, una pantalla de 200 metros cuadraos y cola técnica del meyor y más contemporaneu circu que se realiza anguaño nel mundu.

Apocalipsis tresllada al espectador al mundu dempués del colapsu, onde guerres, seques, enfermedaes, caos medioambiental y conflictos ente races dexaron un planeta afaráu, ensin apenes recursos pa subsistir y onde namá queda un pequeñu grupu de supervivientes, estremaos en clanes, que tomaron el control de la tierra. Esta cuarta entrega del Circu de los Horrores naz de la necesidá de crear un espectáculu onde se glaye fuerte pa recordanos qu’el nuesu planeta ta enfermu y que ta nes nueses manos revertir esa situación.

17/05/2019
Un final inéditu en La Cubilla pa les etapes asturianes de La Vuelta

La decimosesta etapa de La Vuelta, que va tener llugar el 9 de setiembre, va rematar nel altu de La Cubilla (Ḷḷena), tres un percorríu de 155 kilómetros que va empezar en Pravia y qu’inclúi dos puertos de tercer categoría (altos de Mallecina y de La Cabruñana) y trés de primera (puertu de Marabio, La Cobertoria y La Cubilla).

El director xeneral de Comerciu y Turismu, Julio González Zapico, que presentó güei la carrera xuntu cola alcaldesa de Ḷḷena, Gema Álvarez, y el director de La Vuelta, Javier Guillén, destacó la importante promoción qu’ufierta al Principáu una competición col prestíu y espardimientu de La Vuelta. «Contribúi a afayar pal gran públicu enclaves que se converten n’auténticos iconos pal ciclismu, daqué qu’esperamos qu’asoceda tamién cola Cubilla», apuntó.

Los itinerarios asturianos de La Vuelta 2019 entienden zones de mariña y monte, urbanes y rurales, del oriente, del centru y del occidente del país. Les trés etapes van desenvolvese los díes 7, 8 y 9 de setiembre colos siguientes percorríos: San Vicente de la Barquera-Uviéu, Tinéu–Santuariu del Xardón y Pravia–alto de La Cubilla.

17/05/2019
Visita guiada solidaria pel Xixón Industrial

Conocer la hestoria industrial de Xixón y, al mesmu tiempu, collaborar col Centro de Iniciativas, Solidaridad y Empleo (CISE). Ye la propuesta pa mayu que forma parte del ciclu de visites guiaes solidaries que Xixón Turismu entama esti añu.

La visita empecipia en Fomentu, llugar que sirvió como puertu pesqueru, carboneru ya industrial. El percorríu sigue per Cimavilla y l’antigua Fábrica de Tabacos. Darréu, visítase la Casa Natal de Xovellanos, la plaza Mayor, Campu Valdés y la Escalerona, zona d’espardimientu y de balnearios a finales del XIX. La visita termina na Ciudadela Celestino Solar, ún de los pocos exemplos de vivienda obrera que se caltuvo hasta los nuesos díes y que sirve pa conocer les condiciones de vida de les families obreres de finales del XIX y principios del XX.

La visita va realizase los díes 18 y 26 de mayu a les doce de la mañana y y va costar cinco euros. El puntu d’alcuentru ye la oficina d’Infoxixón en Fomentu. La duración aproximada de la visita ye de dos hores. Ye preciso inscribise llamando al teléfonu 985 341 771 o escribiendo un corréu lletrónicu a infogijon@gijon.info. Tolo recaudao nes visites va dase al Centro de Iniciativas, Solidaridad y Empleo (CISE).

17/05/2019
El Sporting quier desquitase en La Romareda

El Sporting visita esti sábadu La Romareda (21 hores), en partíu de LaLiga 123, correspondiente a la xornada 39, que va televisar Gol. Va Arbitrar l’alcuentru’l alcoyano Saúl Ais Reig. El Sporting va xugar con el so primera equipación. El cuadru xixonés tien les baxes médiques de Isma Cerro, Aitor García, Ivi y Diego Mariño; la de Blackman por enfermedá (procesu víricu), y la de Nacho Méndez por acumuladura d’amonestaciones. Vuelve tar a disposición Djurdjevic tres el partíu de sanción que cumplió la pasada xornada.

José Alberto facilitó la llista de convocaos tres l’entrenamientu qu’esta mañana dirixió n’El Molinón a puerta zarrada. Quedó integrada por Dani Martín, Christian Joel, Molineru, Cofie, Babin, Carmona, Canella, Andre Sousa, Lod, Geraldes, Peybernes, Cristian Salvador, Traver, Pablo Pérez, Djurdjevic, Álex Pérez, Álex Allegría y Pedro Díaz.

El Zaragoza algama esta xornada cola totalidá de los sos xugadores a disposición, ensin mancaos nin tampoco sancionaos. El técnicu del cuadru aragonés puede volver cuntar col exsportinguista Guitián, que folgó la pasada fin de selmana n’Almendralejo por acumuladura de amonestaciones.

16/05/2019
José Alberto quier recuperar «intensidá y competitividá nes árees»

José Alberto quier recuperar «intensidá y competitividá nes árees». L’entrenador del Sporting cree que daqué pudo perdese nos últimos alcuentros y velo necesario pa poder vencer esti vienres al Zaragoza nel so campu, nun partíu difícil, énte un rival esixente y nun escenariu que tamién lo ye».

Nin atrás nin p’alantre, insistió en que «hai que centrase nel presente y apurar les opciones que podamos tener hasta l’últimu segundu, porque, anque remotes, inda queden opciones». Por eso quier alloñase de distracciones esteriores.

Preguntáu por Pedro, al que ve «picando del primer equipu dende va tiempu», aseguró velu coles mesmes opciones pa poder xugar en La Romareda que al restu de los xugadores que viaxen: «Fixo merecimientos pa ello».

16/05/2019
El Rei de la Nueche xúbe al tronu de Metrópoli

Les últimes temporaes de ‘Xuegu de Tronos‘ tuvieron un personaxe qu’ensin dulda marcó tol filo argumental: El Rei de la Nueche, un protagonista fundamental na última temporada de la serie. L’actor que da vida al personaxe na ficción, Richard Brake, va visitar esti branu la convención de cómics de Metrópoli.

L’intérprete británicu lleva casi 30 años trabayando nel mundu del cine y la televisión y anque en fíxose tan conocíu por interpretar al famosu personaxe de ‘Xuegu de Tronos’, tamién participó en títulos tan destacaos como ‘Batman Begins’ o ‘Thor: El mundu escuru’. El Rei de la Nueche marcó’l destín de los personaxes de ‘Xuegu de Tronos’, una de les series más valoraes de les últimes décades tantu a nivel artísticu y técnicu como a nivel d’audiencia. Un ésitu ensin precedentes que col estrenu mundial de cada capítulu aumenta y reafita la so lexón de siguidores, que se dediquen a especular y formular teoríes sobro lo que va asoceder nel próximu episodiu.

Metrópoli, ún de los festivales de referencia n’ociu y entretenimientu del país, siempres ufiertó a los siguidores de ‘Xuegu de Tronos’ conteníu rellacionáu cola serie. Dos de los sos actores, Kristian Nairn, (Hodor) y Sibel Kekilli (Shae), visitaron el festival nel añu 2017 y nesta sesta edición y con motivu de la última temporada de la serie, el festival va tener un invitáu bien especial: Richard Brake, l’actor qu’interpretó al Rei de la Nueche. Brake va participar n’alcuentros colos fans, charres y va cuntar cómo foi’l so pasu por una de les producciones de ficción más espectaculares de les últimes décades. Nes próximes selmanes, la Comic Con de Metrópoli va anunciar nuevos invitaos colos que va cerrar el so cartelu d’anguaño.

Una de les convenciones de cómics más relevantes del país

Metrópoli Comic Con ye xuna convención de cómics que se celebra dientro del festival Metrópoli, del 28 de xunu al 7 de xunetu na Recintu Ferial Luis Adarode Xixón. El autores de Marvel y DC más relevantes del mundu del cómic y actores de sagues de ciencia ficción pasaron per esta convención que se celebra dende fai seis años na ciudá, nel marcu del festival Metrópoli.

16/05/2019
Espectacular accidente de Fernando Alonso n’Indianápolis

El pilotu asturianu de Fórmula 1, Fernando Alonso, salió ilesu d’un espectacular accidente na segunda xornada d’entrenamientos llibres de les 500 milles d’Indianápolis. Na curva 2 del circuitu, l’uvieín perdió’l control del so McLaren y chocó hasta tres veces col muru. «Vamos volver más fuertes. L’equipu ta asegurándose de que too tea llisto pa mañana. Toi llistu pa mañana. Nun tengo mieu, vamos volver a ser rápidos de nuevu», declaró tres lo asocedío.

16/05/2019
Deteníu en Francia Josu Ternera

El militante de la organización terrorista ETA más buscáu polos servicios policiales tantu españoles como franceses foi deteníu na localidá de Sallanches, Departamentu d’Alta Saboya (74), (Francia). Sobre Josu Ternera pesa una Orde Internacional de Detención dictada por Interpol. El terrorista moraba cerca de la localidá de Saint Gervais les Bains, nuna zona bien allegada pa la práctica de deportes de iviernu. La localidá atópase a escasa distancia de les fronteres ente Francia, Suiza y Italia.

La busca de Josu Ternera remóntase al so pasu a la clandestinidá en payares de 2002, cuando yera parlamentariu por Euskal Herritarrok. Desapaeció tres ser citáu a declarar pol Tribunal Supremu por ordenar l’atentáu contra la Casa Cuartel de Zaragoza nel que fueron asesinaos 11 persones, 6 de elles menores de edá.

Los esfuerzos desenvueltos fueron un llabor permanente que s’intensificó pola so participación nel postreru comunicáu d’ETA del 3 de mayu de 2018. Fueron munches les pistes siguíes pa la localización del terrorista hasta el so localización en los Alpes franceses.

16/05/2019