Xixón al día

Autor: xixonaldia

  • Muyeres zarra la xira Humanes na Llaboral en marzu

    Muyeres zarra la xira Humanes na Llaboral en marzu

    Muyeres ye ún de los nomes más importantes del folclor asturianu. Esti colectivu nació en 1993 cola unión de muyeres procedentes de dalgunos de los grupos d’investigación etnográfica más destacaos. L’oxetivu que teníen yera’l de reivindicar la música de percusión del país y el protagonismu de la muyer nel caltenimientu de la tradición sonora asturiana. Cuasi 30 años depués, con seis discos publicaos y con una montonera d’espectáculos entamaos; siguen siendo una pieza fundamental de la cultura asturiana.

    ‘Humanes’, ye’l so últimu discu y un trabayu históricu na so trayectoria porque, per primer vez, nun compilen cantares tradicionales, sinón quaxunten 13 canciones de composición propia. Les lletres homenaxeen a les humanes; a eses muyeres anónimes que fueron faciendo historia. La música ye ellaborada, con muncha calidá y esplora distintos soníos dientro del folk asturianu. L’espectáculu, estrenáu nel Teatru La Llaboral de Xixón en xineru 2020, pon el ramu nun conciertu fin de xira nel mesmu teatru. Nestos cuatro años l’espectáculo pudo vese en dellos escenarios asturianos como’l MCC de Mieres, el Nuevu Teatru de La Felguera, el Niemeyer o nel festival Arcu Atlánticu de Xixón, entre otros.

    Les entraes yá tan disponibles calcando nesti enllaz.

  • El ceramista Raúl Rodríguez recibe’l Premiu Nacional d’Artesanía

    El ceramista Raúl Rodríguez recibe’l Premiu Nacional d’Artesanía

    L’artesanu Raúl Rodríguez Arias, dedicáu a la producción y diseñu de cerámica de L.lamas de Mouru (Cangas), llogró’l Premiu Nacional d’Artesanía na categoría de Productu pola so colección Piel de Mouro. Rodríguez conviértese asina nel primer artesanu asturianu en llograr esti importante galardón, concedíu pol Ministeriu d’Industria y Turismu al traviés del Fundesarte, la área d’artesanía de la Fundación Escuela d’Organización Industrial (EOI).

    Rodríguez vien de una familia con una dilatada tradición venceyada a la cerámica de L.lamas de Mouru. Dende 2015 dedicóse a la creación de colecciones que funden la tradición artesanal cola innovación. En 2022 el so trabayu foi reconocíu col Premiu Pieza Única que convoca la Conseyería de Transición Ecolóxica, Industria y Desenvolvimientu Económicu.

    La entrega del premiu celebróse nun actu presidíu pol ministru d’Industria y Turismu, Jordi Hereu, al qu’asistió’l director xeneral de Comerciu, Julio Zapico, en representación del Gobiernu d’Asturies.

    La conseyera de Transición Ecolóxica, Nieves Roqueñí, felicitó a Raúl Rodríguez y calificó de “finxu” la concesión, per primer vegada, del Premiu Nacional d’Artesanía a un creador asturianu. “Esta reconocencia visibiliza la puxanza del nuesu sector artesanu y la escelencia de los nuesos ceadores”, señaló la conseyera, quien destacó’l compromisu del Executivu autonómicu con esta actividá, tantu pol volume de recursos asignaos como pola intención d’ellaborar en 2025 un plan estratéxicu con horizonte temporal hasta 2030.

    Nesti sentíu, recordó que la conseyería llogró en 2010 el Premiu Nacional d’Artesanía na categoría de Promoción pa Entidaes Públiques poles sos polítiques de sofitu y puesta en valor de l’artesanía rexonal. Coles mesmes, en 2020 fueron premiaos los Ferreiros de Mazonovo, de Santalla d’Ozcos, col premiu Promociona pa entidaes privaes.

  • Los museos de Xixón pasaron de 500.000 visitantes mientres 2024

    Los museos de Xixón pasaron de 500.000 visitantes mientres 2024

    Los ocho museos que componen la Rede Municipal de Museos de Xixón (Parque Arqueolóxicu-Natural de la Campa Torres, Muséu de les Termes Romanes de Campo Valdés, Muséu de la Villa Romana de Veranes, Muséu Casa Natal de Xovellanos, Muséu Nicanor Piñole, Muséu del Ferrocarril d’Asturies, Muséu de la Ciudadela de Celestino Solar y Muséu del Pueblu d ́Asturies) faen estos díes balance del añu 2024. Tocantes a públicu l’enclín sigue siendo bien bonu y, per primer vegada, van superase los 500.000 visitantes. Hasta agora, la meyor cifra de la serie histórica fuera la del pasáu añu 2023, con un total de 436.792 visitantes. Poro, l’incrementu estimáu a la finalización del actual añu va ser d’alredor d’un 15% y va contabilizase un nuevu datu récord de visitantes.

    Colos datos a fecha de 30 de payares d’anguaño munchos de los museos yá pasaren los númberos que llograren en tol añu 2023. Son los casos del Muséu de les Termes Romanes de Campo Valdés con 114.258 visitantes (113.004 en 2023), el Muséu de la Villa Romana de Veranes con 12.838 (10.794 en 2023), el Muséu Casa Natal de Xovellanos con 54.506 visitantes (42.445 visitantes en 2023), el Muséu del Ferrocarril d’Asturies con 83.323 (76.085 en 2023) y el Muséu del Pueblu d ́Asturies con 145.862 visitantes (108.241 en 2023).

    Amás, los museos de la rede entamaron esposiciones y actividaes fuera de los sos equipamientos que los sos númberos de visitantes nun tán contabilizaos nes cifres antes indicaes. Foi’l casu, a manera d’exemplu, de les esposiciones “Mucho más que arcilla. El
    comercio cerámico a través del Hiberus”” entamada polos Museos Arqueolóxicos na Sala d’Esposiciones de l’Antigua Rula, “José Velez. (1931-2012) Maestru del fotoperiodismu n’Asturies”, entamada pol Muséu del Pueblu d ́Asturies na Sala de Trascorrales d’Uviéu, y “Orto y ocaso. Vidriu y lloza en Xixón, sieglos XVIII-XX” entamada pol Muséu Casa Natal de Xovellanos y el Muséu del Pueblu d ́Asturies y na que se presentaron les importantes colecciones museográfiques municipales relatives a les Artes Industriales. Esta esposición celebrada nel Palaciu de Revillaxixéu tuvo un gran ésitu de públicu recibiendo 45.810 visitantes.

    La organización periódica d’esposiciones temporales en tolos equipamientos, la renovación parcial d’árees espositives de les esposiciones permanentes (casu de la Campa Torres y el Muséu del Ferrocarril), les nueves llínees d’investigación presentaes (casu tamién del xacimientu arqueolóxicu al traviés del Proyectu Riola), la presentación d’importantes donaciones amestaes a la colección artística municipal y, poques gracies, l’amplia y variada propuesta de programación d’actividaes que tolos museos realizaron mientres l’añu, fueron la clave pa llegar a superar el mediu millón de visitantes.

    Anguaño, amás, y tres alcuerdu de Plenu del Conceyu de Xixón empecipióse’l grupu de trabayu pa cuntar con un nuevu Plan de Museos de Xixón nel que participen representantes del Conseyu Sectorial de Cultura, mesmo que de los distintos museos municipales. Esti Plan que, previsiblemente, va tar llistu a finales de 2025 tendrá de dexar establecer una visión de la rede a años vista, determinando’l desenvolvimientu de la mesma en base a unos oxetivos estratéxicos, estableciendo midíes concretes nel curtiu y mediu plazu pa la so consecución ya incorporando mecanismos d’evaluación.

  • Candlelight alluma la nueche del sábadu en Xixón

    Candlelight alluma la nueche del sábadu en Xixón

    La nueche del sábadu en Xixón yera fría y llovía. Nun había muncha xente pela cai pero, na Colexata de San Xuan Bautista, una filera esperaba pa entrar a una de les esperiencies navidiegues del añu: Candlelight.

    Dientro del recintu qu’antaño foi capiya privada de los condes, cientos de veles allumaben un espaciu que, a poco y a poco, diba enllenando los sos asientos. Los protagonistes, el cuartetu de cuerda asturianu Arpeggio, una composición de músicos asturianos que lleven tocando xuntos dende va yá más de 13 años formáu por dos vigulines, una viola y un violonchelu.

    En dos pases, unu a les 19:00 y otru a les 21:00 hores, los y les artistes punxeron el toque navidiegu de la nueche, repasando dalgunos de los temes más conocíos que se venceyen col Nadal. Bandes sonores de Love Actually, Que bello es vivir o Frozen allumaron esa nueche del sábadu fría, pero que caleció col bon facer de Sofía, Iria, Adrián y Jorge.

    Nun podíen faltar clásicos del Nadal, como Last Christmas, de Wham! o El Tamborilero, cantares que formen parte d’unes feches concretes, como ye tamién una artista cásique navidiega, Mariah Carey. Col so cantar All I want for Christmas is you remató una nueche inescaecible na Colexata de San Xuan Bautista

  • Luis Benito García va llevar la Medaya d’Asturies pola so promoción de la cultura sidrera

    Luis Benito García va llevar la Medaya d’Asturies pola so promoción de la cultura sidrera

    El presidente d’Asturies, Adrián Barbón, anunció güei la concesión de la Medaya d’Asturies a Luis Benito García, director de la Cátedra de la Sidra y promotor de la candidatura qu’impulsó la declaración de la cultura sidrera asturiana como Patrimoniu Inmaterial de la Humanidá.

    «Profesionales de distintos perfiles trabayaron bien duru pa consiguir esti llogru, so la coordinación d’un comité director dafechu comprometíu cola so xera, dispuestu a superar los retos y desafíos hasta consiguilo. Yera un oxetivu ambiciosu, pero los fechos demuestren que yera posible», manifestó’l presidente.

    Nel Llagar Cortina, en Villaviciosa, onde se celebró esta reconocencia, Barbón destacó la so trescendencia, que va suponer un revulsivu p’Asturies «a tolos niveles».

    El presidente encamentó a nun perder de vista los compromisos adquiríos al rodiu de la preservación y proyección de la cultura sidrera y los sos valores únicos, que van dende l’escanciáu hasta los cantares populares, el llinguaxe propiu o les manifestaciones artístiques. «Tamién tenemos de perfeccionar el procesu d’ellaboración y distribución de la sidra», abondó.

    «Hai enforma que facer, y non solo dende’l Gobiernu d’Asturies, sinón tamién dende los conceyos, les asociaciones, l’empresariáu, el sector turísticu, la Universidá d’Uviéu y la ciudadanía. Tamos de norabona, porque Asturies ta de restallu».

  • Iniciativa pol Asturianu revela una nueva discriminación al reclamar l’usu de la toponimia oficial nun DNI

    Iniciativa pol Asturianu revela una nueva discriminación al reclamar l’usu de la toponimia oficial nun DNI

    Iniciativa pol Asturianu sollerta de nueves torgues nel usu de la toponimia oficial nel DNI. L’asociación ta acabante de recibir la quexa d’un ciudadanu qu’acudió con cita previa a la comisaría de la Policía Nacional de La Pola Siero’l pasáu 27 de payares pa faer un duplicáu del Documentu Nacional d’Identidá. Una vegada en dependencies policiales solicita la modificación del topónimu d’Uviéu, treslladando que la pareya del ciudadanu yá cuenta con esa forma nel so DNI y que, polo tanto, ye posible. A partir d’esti momentu, niéguense a faer el cambéu poniendo toles trabes posibles. Amás d’ello, la persona que taba faciendo’l trámite de la duplicación comentó riéndose que “suena mal Uviéu. Pero, ¿en serio?”. Por esti motivu, el duplicáu del carné faise col topónimu ‘Oviedo’ en contra de la voluntá del ciudadanu.

    L’afectáu llamó a posteriori a la citada comisaría pa entrugar el motivu de la negación de la modificación de la toponimia nel duplicáu del DNI ensin obtener rempuesta y cortando hasta en tres ocasiones la llamada. Nel primer intentu nun se contestó. Na segunda llamada directamente recibe una mala contestación argumentando que “no es posible y que si quiere que vaya usted a otra oficina”. Na cabera llamada, la persona qu’atendía al teléfonu dixo de manera insultante que “no es posible hacerlo, que no da opción a hacerlo. Busque usted una partida de nacimiento y vaya a otra oficina”.

    Por mor d’esta discriminación, Iniciativa pol Asturianu fizo llegar a la Delegación del Gobiernu n’Asturies un escritu desplicando esta discriminación. Nel documentu, la organización reclama una disculpa col ciudadanu afectáu y la reposición del so carné d’identidá col topónimu tradicional. El colectivu en defensa del idioma tamién demanda nel rexistru un usu y presencia normal de la toponimia oficial de los diferentes conceyos nos documentos sin que’l so pidimientu suponga un problema o perxuiciu pa les persones qu’asina lo soliciten.

    Asinamesmo, la entidá solicita al departamentu d’Adriana Lastra l’actualización de les bases de datos pal emplegu de los nomes oficiales, garantizando d’esta manera el cumplimientu y respetu a la llexislación autonómica. Nesi sen, la organización recuerda qu’anovar les bases de datos p’automatizar l’usu de los nomes tradicionales y qu’éstos apaezan na aplicación informática de forma automática ye imprescindible pa nun depender del recordatoriu del ciudadanu como asocede agora.

    L’asociación de reivindicación llingüística pidió tamién al muérganu responsable de les Fuercies y Cuerpos de Seguridá del Estáu n’Asturies avanzar na normalización del asturianu apostando pola inclusión del idioma nel DNI pa que vaya redactáu en billingüe (asturianu/castellán). Esta ye una reivindicación que dellos ciudadanos ficieron yá nes comisaríes d’Asturies y que sigue ensin respuesta. Nel casu d’otres comunidaes autónomes, como Galicia, Euskadi y Baleares, tamién hebo una recuperación de la so toponimia hestórica. Sicasí, les sos formes tradicionales sí que son respetaes y emplegaes pol conxuntu de les alministraciones públiques del Estáu.

    El colectivu plantega amás a la Delegación del Gobiernu que recuerde a les comisaríes y al so personal la importancia del cumplimientu de la toponimia oficial d’alcuerdu a lo que recueye l’ordenamientu xurídicu no tocante a esta cuestión. Iniciativa pol Asturianu espresa’l so sofitu al afectáu ante esta situación d’indefensión y reconoz el so compromisu llingüísticu y solicita una intervención clara de la Delegación del Gobiernu.

  • Muerre’l Tordín de Frieres a los 103 años

    Muerre’l Tordín de Frieres a los 103 años

    Llutu na música asturiana cola muerte de Jose Fernández, meyor conocíu como «El Tordín de Frieres». El Tordín yera unu de los grandes referentes de la tonada asturiana y tamién compositor, con más de 30 temes.

    Algamó la victoria en dellos concursos y percorrió tola xeografía de la península faciendo bandera de la música d’Asturies. El fechu más internacional asocedió en xunetu de 1961, nel Festival de Música de Langollen, onde ganó cola Coral Polifónica Xixonesa representando a Asturies en Reinu Xuníu. Amás, foi’l primer cantante de tonada qu’interpretó esta música en televisión. Tamién canto pa reis, concretamente los de Bélxica, Balduino y Fabiola.

  • L’Hospital Universitariu de Cabueñes va estrenar los sos dos nuevos quirófanos en xineru

    L’Hospital Universitariu de Cabueñes va estrenar los sos dos nuevos quirófanos en xineru

    L’Hospital Universitariu de Cabueñes va estrenar en xineru la so nueva área quirúrxica, asitiada na tercer planta del edificiu C y dotada con dos quirófanos con tecnoloxía d’última xeneración: unu destináu a anxología y ciruxía vascular y otru pa ciruxía robótica. Esta actuación supunxo una inversión de 1,4 millones.

    Caún de los dos nuevos quirófanos cunta con 62 metros cuadraos de superficie. Nunu d’ellos instalaráse’l robot Da Vinci, que dende 2023 funciona de forma provisional n’otra sala d’operaciones. Pela so parte, nel quirófanu híbridu va asitiase’l anxógrafu dixital adquiríu apocayá por 873.950 euros.

    El centru de cabecera del área sanitaria V, que foi pioneru n’España al instalar en xunu de 2011 un quirófanu híbridu pal serviciu de angiología y ciruxía vascular, suma agora col nuevu angiógrafo una plataforma de terapia guiada por imaxe que va dexar llevar a cabu procedimientos quirúrxicos endovasculares de forma más segura, eficaz y eficiente.

    Amás, la incorporación del sistema robóticu Da Vinci a un nuevu quirófanu va dexar siguir avanzando na ciruxía mínimamente invasiva en procesos oncolóxicos y d’alta complexidá qu’afronten los servicios de Ciruxía Xeneral, Xinecoloxía, Uroloxía y Otorrinolaringoloxía. Esta última especialidá va ser pionera nel usu de la ciruxía robótica n’Asturies.

  • Los conciertos Candlelight de Navidá lleguen a Xixón na Colexata de San Xuan Bautista

    Los conciertos Candlelight de Navidá lleguen a Xixón na Colexata de San Xuan Bautista

    Estes Navidaes, los conciertos Candlelight de Fever lleguen a Xixón na Colexata de San Xuan Bautista. Mientres el mes d’avientu, los asistentes van poder esfrutar de villancicos como Nueche de Paz, We Wish You a Merry Christmas o Jingle Bells, ente munchos otros, lo mesmo que de bandes sonores navidiegues o El Cascanueces, interpretaos por un cuartetu de cuerda nun espaciu únicu allumáu per miles de veles y afatáu con decoración navidiega.

    Esta esperiencia dexa a los asistentes somorguiase na música clásica y celebrar la Navidá en compañía de familiares y amigos. Amás, pa quien busquen un regalu especial, los conciertos tán disponibles como tarxetes de regalu oficiales, que pueden ser adquiríes na web o aplicación de Fever y trocaes por cualesquier Candlelight n’España.

    Candlelight ye una serie de conciertos orixinales creaos por Fever coles mires de democratizar l’accesu a la música clásica. Esti formatu innovador ufierta una esperiencia musical en vivu única al traviés d’una variada ufierta de programes que satisfaen tolos gustos, interpretaos por músicos locales en llugares emblemáticos y col espaciu y los intérpretes allumaos per miles de veles.

    Candlelight convida a un públicu más ampliu que quiciabes nunca consideró asistir a un conciertu de música clásica. Amás, conecta coles pieces más icóniques de los grandes compositores y colos ésitos de reconocíos artistes contemporaneos, interpretaos d’una manera distinta.

  • VESU anuncia feches pa 2025 y pon a la venta los sos primeros 100 abonos ciegos a un preciu reducíu

    VESU anuncia feches pa 2025 y pon a la venta los sos primeros 100 abonos ciegos a un preciu reducíu

    Nesta época del añu na que tol mundu ta buscando atopar el regalu más prestosu pa esta Navidad, VESU quier ponetelo fácil. El próximu miércoles 11 d’avientu, dende les 12 de la mañana van asoleyar los primeros 100 abonos ciegos a preciu reducíu de 34,95€ + gg y too, enantes de que la siguiente selmana anuncien el primer avance del cartelu 2025. Les llocalidaes, que después van poder canxease por pulseres d’accesu y de pagu nel festival, van poder mercase na web www.vesu.es

    D’esta forma VESU quier reconocer la fidelidá de les persones que-yos presta la música y que lleven casi cinco años sofitando’l festival cola so asistencia. El festival de música independiente nel centru d’Asturies va celebrar ente’l 20 y el 22 de xunu de 2025 la so sesta edición y va contar un añu más col patrociniu del Ayuntamiento de La Ribera y la Fundación Municipal de Cultural del Ayuntamientu d’Uviéu.

    VESU va cuntar una vez más con Vibra Mahou que torna a demostrar asina’l so compromisu cola música en directo, amosando artistes y públicu y sofitando esperiencies cinco estrelles rellacionaes cola música y la cultura cervecera, amás de dar voz y sofitu a la escena musical y artística.