Xixón al día

Autor: xixonaldia

  • El mercáu navidiegu Xixón pierde’l so nome n’asturianu y pasa a llamase “Mercado Navideño de Gijón”

    El mercáu navidiegu Xixón pierde’l so nome n’asturianu y pasa a llamase “Mercado Navideño de Gijón”

    El mercáu navidiegu Xixón va perder esti añu la so denominación n’asturianu y pasará a conocese oficialmente como “Mercado Navideño de Gijón”. Con esti cambéu, desapaez de la imaxe pública del eventu un nome que yá formaba parte del paisaxe festivu de la ciudá, especialmente nel entamu del nadal.

    La sustitución del nome n’asturianu supón tamién una mengua na presencia visible de la llingua propia nel ámbitu festivu y turísticu, onde yera habitual atopar rotulación y materiales n’asturianu xunto col restu d’actividaes del nadal. Pa munches persones, esti tipu de denominaciones tien un papel simbólicu importante na identidá cultural de Xixón, y la so ausencia dexa al eventu con una imaxe menos venceyada a les formes y denominaciones tradicionales de la ciudá.

    Asina, el cambéu de mercáu navidiegu a mercado navideño marca un puntu d’inflexón na presencia pública del asturianu nun de los eventos más concurríos del añu.

  • La Llaboral acueye’l 8 y 11 d’avientu les Xornaes de la Música Tradicional Asturiana

    La Llaboral acueye’l 8 y 11 d’avientu les Xornaes de la Música Tradicional Asturiana

    La conseyera de Cultura, Política Llingüística y Deporte, Vanessa Gutiérrez, presentó güei la programación de les Xornaes de la Música Tradicional Asturiana, un alcuentru que se va celebrar na Llaboral Ciudá de la Cultura, en Xixón, el 8 y el 11 d’avientu, pa difundir esta manifestación artística y abrir un espaciu de diálogu y reflexón sobre la so importancia.

    Gutiérrez destacó qu’estes espresiones culturales constitúin “una pilastra fundamental sobre’l que se sofita la identidá asturiana”, polo que sorrayó la necesidá de calteneles, por casu, al traviés de los espedientes empecipiaos pa declarar bienes d’interés cultural (BIC) de calter inmaterial la cultura asturiana de la gaita, les mazcaraes d’iviernu, el teatru costumista o les dances tradicionales, que se sumen a les yá reconocíes, como la misa de gaita, l’asturianada, los bolos o la cultura sidrera asturiana, esta postrera declarada pola Unesco patrimoniu inmaterial de la humanidá’l 4 d’avientu de 2024.

    Estes xornaes, entamaes en collaboración cola asociación Conceyu de la Gaita, van axuntar a más de 260 participantes, ente intérpretes, investigadores y docentes, coles mires de fortalecer esti tipu d’espresión musical y ampliar la so proyección social y la so tresmisión.

    El primer día va centrase na hestoria y evolución de les escueles de música popular, los modelos europeos y los retos actuales, y va ufiertar un alcuentru d’agrupaciones que va amosar la vitalidá d’estes manifestaciones n’Asturies. Pa ello, va cuntar cola participación de músicos como Carlos Núñez, Xuacu Amieva, Pedro Pangua, José Ángel Hevia y Santi Caleya, y d’espertos como Lisardo Lombardía y la presidenta de la confederación de gaiteros bretonos, Maïna Daouphards.

    La segunda xornada va centrar na fabricación de gaites y nes principales llinies d’investigación en cursu, antes de l’amuesa internacional Gaites del mundu, que va cuntar coles actuaciones d’intérpretes d’Asturies, Galicia, Escocia, Bélxica ya Italia. El programa va rematar col conciertu de clausura al cargu de la Banda Gaites Llacín, que va presentar el so discu Resollu.

  • Inspección de Trabayu detecta alredor de dos mil empleos irregulares n’Asturies

    Inspección de Trabayu detecta alredor de dos mil empleos irregulares n’Asturies

    l’Inspección de Trabayu y Seguridá Social detectaron esti añu n’Asturies 1.935 empleos irregulares, lo que supón un 127,11% más que l’añu pasáu, cuando se toparon 852.Esti ye unu de los datos analizaos na última xunta de la Comisión Operativa Autonómica de la Inspección de Trabayu y Seguridá Social, l’órganu conxuntu del Ministeriu de Trabayu y Economía Social y el Gobiernu d’Asturies nel que s’evalúen los resultaos del llabor inspector n’Asturies y defínense les acciones de llucha contra’l fraude.

    Dende avientu de 2024 y hasta esti mes, los 45 inspectores y subinspectores realizaron 6.119 visites, de les cuales 821 fueron n’horarios especiales. Nesti periodu, aumentaron los controles nocherniegos un 5,70% y un 12% les segundes visites venceyaes a la seguridá y la salú.

    En total, efectuáronse 2.680 actuaciones en materia d’economía irregular, qu’amás d’aprucir cerca de 2.000 empleos somorguiaos detectaron 210 infracciones en prestaciones de desempléu y 63 altes d’empreses ficticies.

    Destaca especialmente la detección d’empleos irregulares de trabayadores estranxeros, con 212 sanciones por importe de 2,2 millones. Esto supon un aumentu del 47,22% nel númberu d’infracciones y del 51,18% nes cuantíes de les multes respecto al añu pasáu.

    Dientro de la área de Seguridá Social, producióse un aumentu del 14,23% na cuantía de los espedientes de lliquidación de cuotes (actes de lliquidación, requerimientos de cuotes, informes de derivación de responsabilidá a la Tesorería Xeneral, etcétera) hasta algamar un valor global de 13,2 millones.

    El númberu d’espedientes sancionadores en materia de Seguridá Social aumentó un 71,26% en comparanza col exerciciu anterior (1.305 infracciones frente a 762) y dobló l’importe de les sanciones (116,5%), hasta llegar a 5,4 millones.

    Respecto al área de falsos autónomos, de xineru a ochobre detectáronse 558 infracciones por un importe de 5,6 millones, lo que dexó aprucir 1.147 nuevos empleos.

  • Fragmentos de craniu y un par de botes, primeros afayos na fosa de La Lloba

    Fragmentos de craniu y un par de botes, primeros afayos na fosa de La Lloba

    El Gobiernu d’Asturies confirma l’afayu de los primeros restos de víctimes de la represión franquista na fuesa de La Lloba, en Castrillón. L’equipu arqueolóxicu Arqueoa, responsable de la intervención, informó sobre la detección de “dos pies coles sos botes, con clavos na suela” y fragmentos d’un craniu, afayos que yá fueron comunicaos a l’autoridá xudicial, qu’autorizó la continuidá de les escavaciones. Les actuaciones en La Lloba formen parte del programa autonómicu pa la recuperación de víctimes del franquismu n’Asturies, que busca alcontrar restos en cunetes y fueses comunes en distintos llugares.

    “Esti tien que ser güei’l mensaxe y la noticia qu’anime a toos estos familiares que lleven décades esperando pa conocer qué pasó colos sos familiares que fueron asesinaos y asesinaes, persones que desapaecieron mientres esa brutal represión que se produció dempués de la guerra”, señaló’l conseyeru Ovidio Zapico.

    Zapico esplicó que la intervención va siguir avanzando nes próximes selmanes: “Nos próximos meses vamos siguir; fixeron una inspección col xeorradar, tienen más o menos toles llinies que de la parte cimera baxen escontra lo que sería la llinia del frente definíes, per onde teníen les trincheres escavaes.”

    El conseyeru tamién espresó’l so deséu de que los trabayos dexen ufiertar respuestes y consuelu: “Lo qu’espero, lo que me gustaría, casi más un deséu, ye que más allá d’estos maraviyosos restos bélicos pudiéramos atopar restos que nos dexen dar una respuesta y un consuelu a toos estos familiares de les víctimes de la represión.”

  • Cristina Cantero, nueva directora del Muséu de la Minería y la Industria d’Asturies

    La historiadora y antropóloga Cristina Cantero foi designada nueva directora del Muséu de la Minería y de la Industria d’Asturies (MUMI). La profesional foi la persona escoyida nel procesu de selección abiertu pa cubrir la vacante que dexó la xubilación de Santiago González Romero, quien dirixó’l muséu mientres 31 años y lideró les sos principales llínees de desenvolvimientu.

    Al procesu presentáronse 44 persones, una cifra que confirma l’interés y el prestíu del equipamientu dientro del ámbitu patrimonial ya industrial. L’amplia y diversa participación de candidatures reflexa la proyección del MUMI como espaciu cultural, educativu y turísticu de primer orde, somorguiáu agora nuna nueva etapa empobinada a fortalecer la so modernización y el so espardimientu, afecha a los valores ya intereses de la sociedá contemporanea.

    Esta renovación alliniase con otres iniciatives impulsaes apocayá por Cultura pa caltener y poner en valor el legáu mineru, como la creación de la Cátedra de la Cultura Minera en collaboración cola Universidá d’Uviéu, empobinada a afondar na investigación, la memoria histórica y los trabayos para la declaración de la cultura minera como Bien d’Interés Cultural (BIC).

    Especializada en patrimoniu y museoloxía

    Cristina Cantero, llicenciada n’Hestoria y con formación n’Antropoloxía Social y Cultural, ye especialista n’interpretación y xestión del patrimoniu, con una consolidada trayectoria nel ámbitu museísticu. Hasta agora exercía como directora técnica del Muséu Etnográficu del Oriente d’Asturies, en Porrúa (Llanes), onde lideró una etapa de renovación basada nos principios de la nueva museografía y de la museoloxía crítica.

    Cofundadora de l’Asociación Asturiana d’Antropoloxía y Patrimoniu Etnolóxicu (Asape), trabayó en proyectos museolóxicos y museográficos pa distintos equipamientos, amás d’integrar comités científicos como’l de la candidatura de la cultura sidrera asturiana a Patrimoniu Inmaterial de la Humanidá pola Unesco.

    Ye autora de diverses publicaciones sobre patrimoniu y etnohistoria y redactó documentos estratéxicos pa la xestión de bienes etnolóxicos, como’l dedicáu a horros y paneres. Tamién collaboró con instituciones de referencia como’l Muséu del Pueblu d’Asturies, la Fundación Archivo d’Indianos y l’Institutu del Patrimoniu Cultural d’España, lo que contribuyó a la investigación.

  • Hijos de la Ruina, Saiko y María Becerra abren el cartelu de Boombastic «The Last Dance»

    Hijos de la Ruina, Saiko y María Becerra abren el cartelu de Boombastic «The Last Dance»

    Boombastic dio la vuelta a la escena col anunciu de lo que va ser el so “Last Dance” un festival que va muncho más allá de los conciertos, onde anguaño se cuntará con 10 “mundos”, diez escenarios temáticos con una zona inmersiva na que los asistentes van poder esfrutar de tou tipu de diversión convirtiendo asina’l festival nuna esperiencia única similar a la d’un parque temáticu.

    Mientres la celebración de la fiesta de presentación, pudo cuntase cola grana de la escena urbana actual, asina como tou tipu de influencers y el platu fuerte de la nueche: Un programa en directu d’una hora de Vaya Vaina, el formatu que yá ye parte de la familia” del festival, asina como dalgunos de los artistes nacionales ya internacionales que van formar parte d’esti El festival, que va tener llugar en Llanera (Asturies) los díes 16, 17 y 18 de xunetu, espera qu’esto sía un antes y un dempués nel mundu de los festivales. El primer avance del cartel ye esti:

     

  • «Nos conciertos dámoslo too»: Grande Amore presenta n’Asturies el so momentu más ambiciosu

    «Nos conciertos dámoslo too»: Grande Amore presenta n’Asturies el so momentu más ambiciosu

    Grande Amore llega a Asturies. El 28 de payares, la Sala Estilo d’Uviéu recibe al proyectu gallegu nun conciertu mui especial xunto a Alba Reche, nel marcu de la xira Vibra Mahou. Entre ruíu, distorsión y una identidá cada vez más sólida, Grande Amore vive’l so momentu más estensu y ambiciosu, con más de cincuenta feches de directu y una evolución artística que los lleva a apostar polo esencial: los bonos cantares, ensin artificios.

    Col humor irreverente y la sinceridá desarmaos que los caracteriza, falamos con ellos sobre esta xira, el choque de realidaes que suponen les sos collaboraciones, la so mirada al futuru y un presente nel que, ente’l vértigu y la ilusión, siguen demostrando que lo suyo ye salir al escenariu y darlo too.

    • ¿Qué significa pa vosotros formar parte de la xira Vibra Mahou y cómo encaxa cola vuestra propuesta musical?

    Pa nós, formar parte de los conciertos de Vibra Mahou ye una allegría enorme. Siempres que daquién cunta con nós pa un ciclu asina, pa un festival, pa una sala… ver que los promotores ponen el so enfotu, el so esfuerciu y el so tiempu en ti ye mui reconfortante. Y una responsabilidá tamién, claro.

    • ¿Cómo tais viviendo esta xira en comparación con otres nes que participestis?

    Esta xira ta siendo la más estensa de toles que fiximos hasta agora, y eso que solo llevamos poco más de mediu añu. Pa finales de 2025, daríamos 55 conciertos dende’l 13 de marzu. Los directos siguen funcionando y siendo la parte fundamental d’esti proyectu, y paez que por fin (toco madera) tamos abriendo un furaquín en dellos festivales grandes a nivel estatal, amás de tocar en sitios emblemáticos de la nuesa tierra como pue ser la Praza da Quintana en Santiago de Compostela o la Sablera de Riazor n’A Coruña. Esperemos que too siga asina de bien y creciendo adulces.

    • ¿Qué puede esperar el públicu asturianu del conciertu del 28 de payares?

    Nos conciertos dámoslo too, eso dende llueu. El públicu que nos venga a ver esti vienres puede esperar ruíu, distorsión, munchos berros… ¡Oi, yo creo que ye una bona forma d’acabar la selmana!

    • ¿Hai dalgo especial preparao pa la fecha d’Asturies que nun se viera n’otres paraes de la xira?

    Lo más especial ya inauditu d’esti conciertu va ser, ensin dala dulda, el fechu de tocar con Alba Reche, que ye a día de güei compañera nuesa de sellu. Pue que este seya unu de los mayores choques de realidaes que se vieren nunca na nuesa hestoria. Creyo firmemente que vamos espantar al 90% del públicu d’Alba, y dígolo como daqué inclusive tienru. Recuérdame a cuando de chaval diba a conciertos de hardcore y metalcore que se celebraben en Burela (el mio pueblu), y como muncha xente (yo incluyíu) a los dos cantares escapaba apavorada de la Plaza de Abastos ante esi estrueldu.

    • Grande Amore caracterízase por una identidá musical mui personal. ¿Cómo definiríeis agora mesmo la vuestra evolución artística?

    Pos… agora mesmo diríate que tamos intentando ser cada vez más un grupu de verdá, al usu. Nun usar tanto’l gimmick d’intentar fundir electrónica y rock pa da-y a esti una vuelta, sinón a cencielles dexanos llevar a la esencia mesma de les composiciones. Esto ye, que si una cantar pide guitarra, baxu y batería… pos, eso, facela con guitarra, baxu y batería. Que, güeyu, quiciabes el puru gimmick yera la clave de la gracia o l’interés que podía tener pa muncha xente’l proyectu, pero bono, asina somos, hai qu’arriesgar nesta vida.

    • ¿Qué cambió na vuestra manera de componer dende los vuestros primeros llanzamientos hasta anguaño?

    Pa bien o pa mal, too. Yo escucho los primeros cantares de Grande Amore y veo los proyectos que tengo nel ordenador de cantares inacabaos, y la verdá ye que nun me reconozo n’absolutu neses composiciones. Pero supongo que ye lo normal, vamos. Pasaron yá 7 años dende esos primeros aproximamientos, y naide ye’l mesmu que yera va 7 años. Camuden los tos gustos, los tos referentes, les tos aspiraciones…

    • ¿Dalguna influencia recién —musical o non musical— que tea marcando la nueva etapa del grupu?

    Diríate que los cantares que toi empezando a facer pa lo que va ser (nun futuru más o menos próximu) el cuartu discu de Grande Amore, tán mui influyíes por Black Sabbath y por The White Stripes. A ver qué sale d’ehí…

    • ¿En qué táis trabayando agora mesmo? ¿Podéis adelantrar daqué sobre próximes temes o proyectos?

    En munches coses, la verdá. Ello ye que lo lóxico (pal proyectu) y saludable (pa mi) sedría nun tar metíu en tantos fregaos al empar. Tenemos un par de collaboraciones bastante importantes pa nós a puntu de salir, toi trabayando nun split con una banda de Santiago qu’almiro muncho de dende va munchos años, tamién empezando a componer pal discu nuevu… Yá te digo, demasiaes coses. Pero asina foi siempres, asina tien que ser y asina va ser.

    • ¿Hai collaboraciones que vos gustaría esplorar llueu?

    Sí, y yá te digo, dos d’elles cumpliéronse. Dame rabia nun poder dicir más y que paeza como que faigo clickbait en vista al futuru, pero ye que claro, nun depende solo de mi dicilo y…

    • Cuando imaxináis el futuru de Grande Amore, ¿pa ónde vos gustaría llevar el proyectu?

    Yo, imaxinar, lo que ye imaxinar… siempres lo imaxino mal, si te soi sinceru. Siempres creo que’l fin ta cerca, que la xente va aburrise de nós y qu’a partir del siguiente añu yá s’acabó too. Por suerte, toi (creyo) empezando a aprender a relativizar esos pensamientos y a ser consciente de que son namás frutu de la mio congoxa. Lo cual nun quier dicir que, efectivamente, en dalgún momentu vamos dexar d’interesar y yá ta. ¿Pa ónde me gustaría llevar el proyectu? Sinceramente, si podemos caltenenos asina, tal que tamos agora… yá ye un milagru. Dedicámonos a la música, la xente quier escuchar los nuesos temes, el directu funciona bien… Nun m’asocede un escenariu medianamente realista que seya meyor qu’esti pa una banda de les nueses característiques, la verdá.

     

  • Avilés va cuntar con 235 viviendes públiques d’arriendu algamadizu

    Avilés va cuntar con 235 viviendes públiques d’arriendu algamadizu

    El conseyeru d’Ordenación del Territoriu, Urbanismu, Vivienda y Derechos Ciudadanos, Ovidio Zapico, presentó güei n’Avilés el proyectu de construcción de 235 viviendes públiques destinaes a arriendu algamadizu na zona de La Grandiella, que va movilizar más de 30 millones d’inversión global. Les edificaciones van distribuyir en dos parceles allugaes en La Grandiella, con 130 pisos nuna d’elles y 105 na otra.

    Zapico, que presentó esta actuación xunto cola alcaldesa d’Avilés, Mariví Monteserin, esplicó que va empezar a materializase a partir de 2026 y que va suponer “un pasu decisivu pa reforzar el parque públicu algamadizu y dar respuesta a les necesidaes de la clase trabayadora de la ciudá”. Amás, esplicó que los presupuestos autonómicos de 2026 van cuntar yá con una partida inicial de 2.465.500 euros pa empezar los trabayos.

    El titular de Derechos Ciudadanos sorrayó la importancia d’estremar ente parque públicu social y parque públicu algamadizu y esplicó qu’esta promoción va integrase nesti postreru, empobináu a facilitar l’accesu a la vivienda a persones trabayadores qu’atopen dificultaes nel mercáu llibre.

    Amás, destacó que’l Gobiernu d’Asturies tien anguaño en fase de llicitación más de 560 pisos de promoción pública destinaos al arriendu algamadizu, de los cualos doce allúguense n’Avilés. La conseyería trabaya coles mires de licitar otru millar más primero que remate la llexislatura.

    En relación colos plazos, Zapico avanzó que la llicitación conxunta del proyectu y la obra va poner en marcha mientres los primeros meses de 2026, una vegada tean vixentes los presupuestos. “Va ser una única unidá alministrativa, de cuenta que’l proyectu y les condiciones de la obra van quedar definíes nun mesmu actu xurídicu”, amestó.

    Respectu al entamu de la construcción, indicó qu’entá ye difícil concretar una fecha esacta, magar se preve que pueda empezar en febreru de 2027, unos 14 meses dempués de l’axudicación.

  • Iniciativa pol Asturianu reclama una rempuesta contundente del Gobiernu d’Uviéu al intentu d’anular la toponimia oficial de la ciudá

    Iniciativa pol Asturianu reclama una rempuesta contundente del Gobiernu d’Uviéu al intentu d’anular la toponimia oficial de la ciudá

    Iniciativa pol Asturianu reclama al Conceyu d’Uviéu una rempuesta contundente énte l’intentu del grupu municipal de Vox d’anular la toponimia oficial de la ciudá na documentación de la ZBE (Zona de Baxes Emisiones). La entidá considera que ye importante desplicar qu’aplicar los topónimos tradicionales y oficiales ye cumplir la llexislación vixente en materia toponímica. Nesi sen, Iniciativa pol Asturianu recuerda que’l Decretu 14/2019, de 13 de marzu, pol que se determinen los topónimos oficiales del Conceyu d’Uviéu, afita l’usu del nome tradicional de la capital col códigu 44 19 01.

    La organización de reivindicación llingüística apunta amás qu’utilizar el nome tradicional axústase plenamente a la Llei d’Usu que nel puntu 1 del artículu 15, relativu a toponimia, recueye que “Los topónimos de la Comunidá Autónoma del Principáu d’Asturies han tener el nome oficial na so forma tradicional. Pal casu de qu’un topónimu tenga usu xeneralizáu na forma tradicional y en castellán, el nome podrá ser billingüe.”

    Iniciativa pol Asturianu insta al equipu de Gobiernu d’Uviéu a desestimar la enmienda presentada pol grupu municipal de Vox relativa a la presencia del topónimu oficial y tradicional d’Uviéu na documentación de la ZBE y a facer una clara defensa de la Llei d’Usu. Dende’l colectivu consideren que ye una oportunidá d’oru pa faer una defensa del patriminiu llingüísticu, de la toponimia y de la Llei d’Usu que’l Partíu Popular d’Asturies defende. “Ye’l momentu d’apostar pola llei, pola convivencia y pol alcuentru frente a la división y la esclusión llingüística. El PP d’Asturies y el PP d’Uviéu tienen la obligación de defender la cultura y la llei frente a postures fuera de la Constitución. Nun se pue aceptar que postures contraries a la Llei y a la realidá llingüística permitan l’anulación de la presencia de la toponimia oficial”.

    “Va unes selmanes el PP recordaba y homenaxeaba la figura de Sergio Marqués y de la obra del so gobiernu. Ún de los fitos del mesmu, foi aprobar la Llei d’Usu. Güei reclamamos valentía al PP pa defender la convivencia de les llingües frente a un clima d’anulación y de crispación como se pretende dende la oposición” argumenta la presidenta de l’asociación, Arantza Margolles.

    Asinamesmo, por mor d’esta situación, Iniciativa pol Asturianu vuelve reclamar al gobiernu carbayón una campaña d’información y sensibilización alredor de la toponimia tradicional de la ciudá y un usu escrupulosu en tolos ámbitos, más que necesariu si quieren qu’Uviéu tenga dalguna opción de ser Capital Europea de la Cultura.

  • Confirmáu un focu urbanu de gripe aviar nel parque de Sabel La Católica de Xixón

    Confirmáu un focu urbanu de gripe aviar nel parque de Sabel La Católica de Xixón

    La Conseyería de Mediu Rural y Política Agraria echó voz de güei al Rexistru d’Animales Sospechosos y Enfermos (RASVE) la detección d’un focu urbanu de gripe aviar nel parque de Sabel La Católica de Xixón. El positivu amenórgase namás a una oca muerta, anque se ta a la espera de conocer el resultáu de los analises practicaos a otres trés aves muertes nel mesmu parque. Esti ye’l segundu focu detectáu n’Asturies, tres confirmase’l positivu d’un ave xabaz en Ribeseya n’agostu.

    Dende’l primer momentu nel que se tuvieron duldes, el Gobiernu d’Asturies y el Conceyu de Xixón trabayaron de forma conxunta y coordinada, en contactu permanente pa garantizar una actuación rápida y eficaz. Coles mesmes, los servicios técnicos del parque aplicaron de momentu les midíes de prevención de riesgos llaborales a les trabayadores, reforzaron la vixilancia de la población d’aves y establecieron controles específicos pa identificar de forma temprana exemplares enfermos o muertos.

    Amás, pa evitar riesgos, en determinaes zones del parque enllantáronse midíes de bioseguridá dirixíes a amenorgar el contactu directu de les aves, tanto con otres especies avícoles xabaces como cola población xeneral.