Xixón al día

Autor: xixonaldia

  • Seis de cada diez asturianos recibieron tratamientu nel HUCA

    Seis de cada diez asturianos recibieron tratamientu nel HUCA

    L’Hospital Universitariu Central d’Asturies (HUCA) atendió a 619.473 pacientes distintos dende la so apertura, el 14 de xunu de 2014, nes nueves instalaciones de La Cadellada (Uviéu). D’estos datos puede estimase que seis de cada diez asturianos yá recibieron tratamientu nel centru a lo menos nuna ocasión.

    El serviciu d’urxencies atendió a 415.869 persones distintes en 1.486.114 episodios; 213.398 pacientes fueron hospitalizaos nos 385.093 ingresos que se producieron; 132.547 fueron interveníos siquier una vegada en dalguna de les 206.926 operaciones realizaes nos 33 quirófanos del hospital y 619.473 persones producieron 10.238.638 d’actos clínicos nes consultes esternes.

    Nel día ente día de los últimos años, les cifres tamién resulten elocuentes. El HUCA ye un enorme centru llaboral nel que trabayen 5.603 profesionales, 1.018 d’ellos médicos, otros 3.000 sanitarios y más de 1.500 persones emplegaes n’otres funciones. Atiende cada xornada, de media, 105 ingresos, 75 intervenciones quirúrxiques, 2.100 consultes y 477 urxencies.

    Tocantes a pruebes, acaldía vienen realizase 238 tomografíes computarizadas, 88 resonancies magnétiques, 201 ecografíes, 85 mamografíes, 38 colonoscopias y 32 gastroscopias.

    Otru indicador llamativu d’actividá son los tresplantes. Nos postreros cuatro meses realizáronse 74: 17 d’ellos de reñón, 22 de córnea, 2 de corazón, 28 de médula y 7 hepáticos. Nos sos diez primeros años, casi 2.400 tresplantes.

    Na so dimensión estatal, el HUCA ye centru de referencia pa distintes práctiques médiques. Por casu, pal estudiu y l’abordaxe de les cardiopatíes familiares. Tamién pal tratamientu del dolor neuropáticu, causáu por una mancadura primaria o disfunción nel sistema nerviosu, por aciu la técnica de neuromodulación cerebral. Otramiente, ye referencia pa la ciruxía reparadora del plexu braquial (la rede de nervios qu’unvia señales dende la médula espinal hasta’l costazu, el brazu y la mano) y pa la ciruxía de los trestornos del movimientu (por casu, pa pacientes de párkinson).

     

  • Anicien los trámites pa que la Llaboral opte a ser Patrimoniu Mundial

    Anicien los trámites pa que la Llaboral opte a ser Patrimoniu Mundial

    La Conseyería de Cultura, Política Llingüística y Deporte empezó los trámites pa que’l complexu de la Universidá Llaboral de Xixón opte a ser Patrimoniu Mundial pola UNESCO, al remitir al Ministeriu de Cultura la propuesta y la correspondiente memoria xustificativa pa que la güei conocida como Llaboral, Ciudá de la Cultura pueda entrar na Llista Indicativa Española.

    L’anunciu fíxolu esta mañana la conseyera Vanessa Gutiérrez, na so participación nel actu interxeneracional Día del Antiguo Alumno organizáu pola Asociación de Antiguos Alumnos de la Universidad Laboral de Gijón. Gutiérrez valoró positivamente l’empiezu de los trámites porque La Llaboral “nun ye solo un edificiu monumental de gran valor artísticu y patrimonial, sinón un símbolu de la tresformación y el dinamismu de la nuestra comunidá del que faen parte cientos de persones de diferentes xeneraciones”. “Ye un exemplu de cómo los espacios pueden trescender la so función orixinal pa convertise en motores de cambiu y de progresu”, añadió.

    La conseyera destacó’l compromisu del Gobiernu d’Asturies con La Llaboral, onde invirtió de recién más de 800.000 euros na restauración de la cúpula de la ilesia y la recuperación de les cruces de la llinterna de la capiella y la de la Victoria que presidía la entrada.

    A la cantidá anterior hai que sumar los más de 400.000 euros invertíos nes antigües cocines del complexu, los 800.000 asignaos pola Conseyería d’Educación pa iguar un centru d’innovación de Formación Profesional o los 36.000 euros dedicaos a la modernización de les infraestructures escéniques del Teatru de la Llaboral. Amás, nos dos últimos exercicios destináronse más de 1,4 millones pa distintes xeres de caltenimientu.

    Asturies ellaboró esti mesmu añu una memoria xustificativa de la candidatura que yá foi remitida al Ministeriu de Cultura pa la so valoración. Posteriormente, esa evaluación va ser elevada al Conseyu de Patrimoniu Históricu español, que decide los bienes que s’incluyen na Llista Indicativa y, tamién, los que tando nesa llista a lo menos un añu puedan presentase ante la UNESCO pal so reconocimientu como Patrimoniu Mundial.

    D’esta manera, l’Executivu asturianu avanza nos trámites pa consiguir el reconocimientu internacional de Llaboral, Ciudá de la Cultura, una demanda que’l Principáu atendió y pola que va siguir trabayando al traviés de la Conseyería de Cultura.

    La Llista Indicativa Española

    La Llista Indicativa ye un instrumentu plantegáu pola UNESCO y qu’en cada país recueye les propuestes nes que se ta trabayando pa la futura propuesta de declaración como Patrimoniu Mundial. Pa tener derechu al reconocimientu, ye obligatoria la presencia na llista a lo menos un añu.

    P’acceder a la Llista Indicativa Española requierse ellaborar un documentu xustificativu qu’analice la realidá del bien propuestu, valore la so importancia patrimonial y la vincule cola Convención de Patrimoniu Mundial, comparándolu con otros bienes similares. Un trabayu que yá realizó y presentó’l Gobiernu d’Asturies.

    Un complexu empezáu en 1948

    Diseñáu por Luis Moya, el conxuntu d’edificios que faen parte de la Universidá Llaboral de Xixón comenzó a construyise en 1948, concebíu como orfanatu mineru. Nel añu 2016 declaróse Bien d’Interés Cultural cola categoría de monumentu.

    Anguaño, en Llaboral, Ciudá de la Cultura conviven la sede de Radiotelevisión del Principáu d’Asturies (RTPA) nel antiguu Conventu de les Clarises, LLABoral Centru d’Arte y Creación Industrial, el Centru Integráu de Formación Profesional, la Recepción, situada nel Patiu Corintiu, la Torre, la Escuela d’Arte Dramáticu, el Conservatoriu Profesional de Música y Danza, la Ilesia, la cafetería, el Teatru de la Llaboral, el Paraninfu y la Facultá de Comerciu, Turismu y Ciencies Sociales “Jovellanos”.

    Estos espacios conviven na Ciudá de la Cultura xunto a empreses de calter priváu y instalaciones nueves que nesti momentu se tán poniendo en marcha, como’l centru de formación d’empreses xestionáu pol Conceyu de Xixón o’l centru formativu pa profesoráu de Formación Profesional qu’impulsa la Conseyería d’Educación.

  • Gobiernu d’Asturies y asociaciones vecinales van collaborar pa impulsar la participación ciudadana

    Gobiernu d’Asturies y asociaciones vecinales van collaborar pa impulsar la participación ciudadana

    La viceconseyera de Derechos Ciudadanos, Beatriz González Prieto, treslladó esta mañana la intención del Gobiernu d’Asturies de collaborar coles asociaciones vecinales pa impulsar la participación ciudadana y buscar fórmules de trabayu conxuntu que refuercen l’alianza de l’Alministración pública con estos colectivos.

    “El movimientu vecinal xuega un papel fundamental nel nuesu territoriu. Crean espacios de socialización y redolaes onde’l sentimientu de pertenencia a una comunidá ye bien fuerte”, aseguró la viceconseyera, quien recordó que’l llabor d’estes agrupaciones viose amenorgáu tres l’andanciu del Covid.

    González Prieto fixo estes manifestaciones tres caltener un alcuentru, acompañada de la directora xeneral de Participación Ciudadana, Tresparencia, Diversidá Sexual y LGTBI, Nuria Rodríguez, con representantes de los colectivos que formen parte de Cavastur, la Confederación Asturiana d’Asociaciones de Vecinos.

    La viceconseyera tamién espresó’l so deséu de que los colectivos vecinales puedan integrase nel desenvolvimientu de la futura Llei de Participación, unu de los oxetivos políticos establecíos pol so departamentu pa la presente llexislatura.

    Pela so parte, la directora Nuria Rodríguez entiende que “les asociaciones vecinales son imprescindibles pa garantizar los procesos democráticos xenerales empezando polo local, pol barriu”. “Les alministraciones públiques tenemos la obligación política de garantizar la máxima espansión de too sentíu democráticu”, añedió.

  • La biblioteca d’Asturies acueye una hestoria de la gastronomía asturiana al traviés de los llibros

    La biblioteca d’Asturies acueye una hestoria de la gastronomía asturiana al traviés de los llibros

    La Biblioteca d’Asturies “Ramón Pérez de Ayala”, organismu dependiente de la Conseyería de Cultura, Política Llingüística y Deporte, inaugura mañana la muestra Gastronomía de mesa y papel, una esposición que fai un percorríu didácticu pela historia de la gastronomía asturiana al traviés de les publicaciones editoriales que conformaron la naturaleza e identidá d’esta disciplina.

    El montaxe espositivu estrémase en trés espacios precedíos por noticies referentes a l’alimentación asturiana apaecíes n’escritos como’l tratáu d’agronomía de Frai Toribio de Pumarada, dellos documentos de la Sociedá d’Amigos del País, les Cartas a Ponz de Xovellanos o la obra Asturias de Bellmunt y Canella.

    El siguiente bloque trata los conteníos rellacionaos colos llibros de cocina y obres referentes a la gastronomía dende 1874, añu nel que se publica un trabayu anónimu baxo’l títulu La Cocina Tradicional de Asturias, hasta 1990. En tercer llugar, destaquen les obres referentes a la gastronomía asturiana publicaes por autores de toles menes, los más d’ellos asturianos. Son materiales que se complementen con semeyes, folletos y cartelería referida a la promoción de la gastronomía característica del Principáu.

    Con esta esposición nueva na Biblioteca d’Asturies, la Conseyería de Cultura exemplifica de forma didáctica la riqueza gastronómica del territoriu asturianu al traviés de los llibros. Ye un montaxe que dexa descubrir los raigaños de los que parte la definición de gastronomía asturiana pal imaxinariu colectivu. Una gastronomía y una cocina de calter rural bien marcáu, pero qu’asitia la so base xeográfica n’autores del centru d’Asturies, y sobre manera del valle del Caudal, lo qu’evidencia al empar la necesidá de siguir recopilando informes y informantes, principalmente nes ales d’Asturies, p’afondar na tradición y la realidá culinaria qu’arrodia a estos espacios xeográficos.

    La esposición ta comisariada por Lluis Nel Estrada y va poder visitase na Biblioteca d’Asturies “Ramón Pérez de Ayala”, n’Uviéu, de magar s’inaugure a les 13 hores del vienres 14 de xunu, hasta’l 8 de setiembre del 2024, nel horariu habitual d’apertura de la Biblioteca.

  • XixónTours estrena visitada guiada sobre la hestoria del asturianu

    XixónTours estrena visitada guiada sobre la hestoria del asturianu

    La ciudá de Xixón foi escenariu de munchos de los momentos más relevantes na hestoria de la llingua asturiana, agora van dase a conocer al traviés d’una visitada guiada.  Con ella arranca otra vuelta’l ciclu de visites guiaes n’asturianu de XixónTours, entamáu pola plataforma d’información sobre ociu, cultura y turismu VerAsturies.com, en collaboración col diariu Xixonaldia.com.

    El percorríu, guiáu pol académicu y fondu conocedor de la hestoria del asturianu Inaciu Galán, va entamar cola llegada del llatín a Asturies, arrancando nes termes romanes y va percorrer más de dos mil años al traviés de los espacios de la ciudá.

    Un percorríu entreteníu dende los proyectos d’una Academia de la Llingua Asturiana de Gaspar Xovellanos y la obra de Xosefa Xovellanos, primer muyer escritora n’asturianu, hasta l’actualidá, pasando pelos espacios de la hestórica manifestación de Conceyu Bable pola entrada del asturianu nes escueles en 1976, ente otros munchos momentos clave pa entender la realidá del idioma y de la propia Asturies d’anguaño.

    La visita va celebrase’l sábadu 29 de xunu a les 12 la mañana, con una duración d’alredor d’hora y media. El preciu ye de 12 euros p’adultos y 6 pa menores de 18 años. Los neños d’hasta 12 años pueden acompañar a la so familia de baldre.

    Les inscripciones han facese na páxina https://xixontours.verasturies.com/. Pueden consultase duldes nel corréu xixontours@verasturies.com o nel teléfonu 984 08 66 26.

  • Desmienten a Moriyón tres declarar que nun cuelga la bandera LGTBI+ na Casa Conceyu «porque XEGA nun lo pidió»

    Desmienten a Moriyón tres declarar que nun cuelga la bandera LGTBI+ na Casa Conceyu «porque XEGA nun lo pidió»

    Un artículu asoleyáu güei n’El Comercio y que recoyía declaraciones de l’alcaldesa de Xixón, la forista Carmen Moriyón, titulaba «La bandera LGTBI+ no ondeará en el Consistorio porque Xega no lo pidió». La noticia citaba amás a l’alcaldesa afirmando que tuviera un conceyu con XEGA, el colectivu LGTBI+ d’Asturies, va trés meses. La organización reivindicativa ta acabante negar dambes afirmaciones, esplicando que «XEGA nun aconceyó cola alcaldesa Carmen Moriyón dende l’entamu de la so llexislatura».

    Dende Xega espliquen que lo afirmao por Moriyón ye «una información falsa dafechu». El cabréu yera considerable esta mañana ente la coordinación del colectivu, que yá veníen llamentando la recién mala noticia de la negativa de los socios de Moriyón, el PP y el conceyal trásfuga que ta nel so equipu, asina como de VOX, a una declaración yá tradicional pa condergar la desigualdá y la violencia exercida contra’l colectivu LGTBI+.

    Dende XEGA llamenten que l’alcaldesa «sofite la negativa del Partíu Popular (PP) a sumase a la firma de la declaración y que nun desdixere la posición del so equipu de gobiernu». El PP declaró que nun defende la declración institucional “porque supon un atentáu reprobable contra los derechos de les muyeres». Pa XEGA esto da a entender «que nun conocen la llexislación y la so aplicación, yá que ye un xuez el que tien de refiertar tala declaración y que si nun ye ciertu’l varón cometería fraude de llei, daqué penao pola nuesa llexislación». Per otru llau, dende XEGA, espliquen «desconocemos a qué se refieren con beneficios llegales y xudiciales de les muyeres”.

    Per otra parte, espliquen dende XEGA que «la bandera LGTBI+ pue colgase na Casa Conceyu de Xixón, en contra de lo que VOX diz n’otres llocalidaes y como asina afirma’l Tribunal supremu, por propuesta propia del gobiernu de la ciudá y ensin que los colectivos tengan que pidi-ylo», en referencia a les pallabres de Moriyón que califiquen de falsedá.

    Aprovechen dende XEGA pa facer un llamáu a salir a la cai’l día 29 a les 18 hores dende’l Paséu de Begoña en Xixón, «pa manifestanos polos nuesos derechos»,  esclariando a los políticos llocales que «nin ye un desfile, nin una cabalgata, nin una marcha». El colectivu, recuerden «manifiéstase pol Arguyu LGTBI+, contra la LGTBIfobia, contra la discriminación y en pro d’un mundu diversu onde prime “Tolos derechos pa toles persones”.

  • Vinu, cerámica y tradición ente les actividaes complementaries del Prestoso Fest 2024

    Vinu, cerámica y tradición ente les actividaes complementaries del Prestoso Fest 2024

    Non solo música ye lo que va ufiertar el Prestoso Fest a tolos asistentes al festival que va tener llugar en Cangas del NArcea ente los díes 1 y 3 d’agostu. Y ye qu’a la propuesta musical, que va tar protagonizada por casi una ventena de bandes y artistes nacionales ya internacionales y por 13 Dj´s, súmense doce actividaes complementaries que van ufiertar una visión xeneral de munchos de los curiosos del suroccidente asturianu.

    La viticultura, l’alfarería y referentes culturales y sociales como’l Monesteriu de Corias o la Sociedá d’Artesanos van ser, asina, dalgunos de los protagonistes d’estes actividaes. Productos tan representativos de la zona como’l Vinu DOP Cangas y la cerámica negro de L.lamas del Mouru van tar representaos en varies d’estes actividaes Toles actividaes tienen un aforu llimitáu y les entraes tán yá disponibles na so páxina web.

  • Rescaten a un escalador na cara este del Urriellu

    Rescaten a un escalador na cara este del Urriellu

    El Grupu de Rescate de Bomberos d’Asturies rescató a un escalador que se mancó tres sufrir una cayida, d’ente 15- 0 metros, na vía de L’Amistá col Diañu, na cara este del Urriellu, en Cabrales.

    L’afectáu porteóse hasta l’abellugu onde pasó la nueche con cuatro bomberos-rescatadores y la médica-rescatadora. Cuando la meteoroloxía lo dexó, treslladáronlu na aeronave hasta’l centru hospitalariu. A falta de más pruebes presentaba mancadura nuna pierna.

    La borrina na zona torgó’l rescate col helicópteru medicalizáu que llogró dexar a dos rescatadores y a la médica-rescatadora na redoma del abellugu pa dirixise a cuerpu hasta onde s’atopaba’l mancáu. Mentanto los compañeros del escalador llograron baxar con él hasta la base.

    Una vegada que l’equipu llegó al incidente y depués d’asistir al mancáu movilizóse un segundu helicópteru con personal de sofitu y camiya de portéu pa poder realizar el treslláu a pie del afectáu hasta l’abellugu. Esti segundu helicópteru llogró dexar a otros dos rescatadores a unos 30 minutos a pie del incidente y darréu tornó a la so base.

  • El carné xoven va tener descuentos nos comercios asturianos

    El carné xoven va tener descuentos nos comercios asturianos

    La Dirección Xeneral de Mocedá robló un conveniu de collaboración cola Unión de Comerciantes d’Asturies que va dexar a los menores de 30 años que seyan titulares del Carné xoven llograr ventayes y descuentos en más d’un centenar de comercios. Con esti nuevu alcuerdu, son yá más de 60.000 los espacios en toa Europa nos que los asturianos y asturianes van poder adquirir beneficios.

    “Pa nós ye fundamental la collaboración públicu-privada y la coordinación col restu de conseyeríes, porque les polítiques de mocedá tienen de ser una exa tresversal nes polítiques del Gobiernu asturianu. Esta tresversalidá ye, ensin dulda, unu de los grandes oxetivos de llexislatura”, esplicó la viceconseyera mientres l’actu. Beatriz González Prieto tamién fixo mención al papel fundamental” que desenvuelve la Unión de Comerciantes “nel fomentu y sofitu del pequeñu comerciu na sociedá asturiana”.

    El director de Mocedá entiende qu’esti alcuerdu “supon una importante apuesta por una sociedá asturiana integrada ya integradora”. “Dende Mocedá queremos apostar pol comerciu de barriu, que ye’l que conecta a les persones, frente a otros modelos de calter impersonal”, afirmó Francisco de Asís Fernández, quien considera primordial sofitar “los productos autóctonos, que dan vida a distribuidores locales y a la población asturiana, amás de ser más sostenible”.

    Fernández tamién adelantró que la intención del departamentu que dirixe ye la de “siguir aumentando’l catálogu de provisores, implementando la collaboración con entidaes que promocionen el deporte y les actividaes al campu”.

    Pela so parte, el director de Comerciu destacó que “frutu de la collaboración y cooperación del Gobiernu col sector comercial los mozos asturianos con carné xoven van poder averase al comerciu físicu asturianu, onde la so seña d’identidá ye la profesionalidá, la especialización y la calidá. Toos ganamos porque se xenera beneficiu económicu y beneficiu social”.

  • Un 84% de los europeos comparte la idea de protexer les llingües minorizaes

    La Rede Europea d’Igualdá Llingüística (ELEN, poles sos siegles n’inglés), colectivu qu’agrupa a 174 organizaciones que representen a 50 llingües y 50 millones de falantes en 25 estados de la Xunión Europea y del que forma parte Iniciativa pol Asturianu dende la so fundación en 2011, presentó esta semana una encuesta del Eurobarómetru a les puertes de la convocatoria electoral del Parlamentu Européu. L’estudiu sociolóxicu analizáu por ELEN recueye qu’una gran mayoría de europeos, una media del 84%, ta d’alcuerdu en que se deben protexer les llingües rexonales o minorizaes.

    L’informe tamién desplica que un 90% de los ciudadanos ente 15-24 años creyen que los europeos debieren falar a lo menos una llingua adicional. Esti datu medra a un 92% de los encuestaos españoles, el mayor valor d’ente tolos Estaos Miembros. El muestréu sociolóxicu tamién apunta que’l 76% los europeos consideren que debieren priorizase polítiques enfotaes n’ameyorar habilidaes llingüístiques. En total, un 80% ente 15-24 n’Europa, n’España tán d’alcuerdu el 84% de tolos españoles. Amás, nel trabayu sociolóxicu apaez tamién l’ampliu porcentaxe (un 84% de la ciudadanía europea) que sofita salvaguardar les llingües rexonales y minorizaes. Esti compromisu col plurillingüísmu crez hasta un 88% n’España.