Xixón al día

Autor: xixonaldia

  • La defensa del asturianu nel ámbitu européu entra en campaña

    Iniciativa pol Asturianu reclamaba esto díes compromisos col idioma a los partíos de cara a les elecciones europees, invitando a los candidatos a desplicar qué van facer dende’l parllamentu européu pol asturianu.

    Nesi sen, Iniciativa pol Asturianu considera que concebir una Asturies n’Europa ye concebir una Asturies que salvaguarda les sos llingües minorizaes, protexendo (y ampliando) los drechos de los sos falantes y promoviendo l’usu de les mesmes; d’alcuerdu cola Carta Europea de les Llingües Rexonales o Minoritaries, de la que’l Reinu d’España ye firmante, sinón acordies cola voluntá de la gran mayoría de los europeos tal como espeya l’Eurobarómetru que presentaben estos díes.

    Iniciativa pol Asturianu yá treslladó a dellos entes europeos como’l Conseyu d’Europa les recomendaciones que propón la entidá pa salvaguardar el futuru del asturianu y los drechos de los sos falantes. A piques de celebrar la xornada electoral del Parllamentu Européu, l’asociación reclamaba compromisos pa defender los intereses de los falantes d’asturianu y eonaviegu nel Parllamentu acordies cola voluntá de la mayoría de los ciudadanos d’España y de la Xunión y pidió tamién a los candidatos que desplicaren qué van facer dende’l Parllamentu Européu pola llingua asturiana.

    La respuesta llegó per parte de Jonás Fernández, eurodiputáu socialista y candidatu asturianu que ta visibilizando la FSA-PSOE pa la so reelección dende Asturies, con dos tuits, n’asturianu y eonaviegu, nos que fala de la necesidá de «curiar, protexer y afalagar la nuesa cultura» dende Bruses, faciendo mención específica a les llingües d’Asturies.

    Amás, l’asturianu ta sintiéndose dacuando nes campañaes, como ocurrió nel mitin de Yolanda Díaz en Xixón, onde la conceyala xixonesa Noelia Ordieres faló n’asturianu reivindicando respetu pa los falantes d’esta llingua.

    No que cinca a la cartelería y publicidá, destaquen les cartes que tán unviando a les cases dende Podemos, que tán redactaes n’Asturies tamién n’asturianu.

    En xeneral una presencia curtia, pero que rescampla, pues nun yera habitual en pasaes cites electorales europees, onde paez que l’usu del idioma s’escaecía davezu per parte de los partíos que defenden la oficialidá.

  • Cultura impulsa la promoción y distribución de curtiumetraxes creaos n’Asturies

    Cultura impulsa la promoción y distribución de curtiumetraxes creaos n’Asturies

    La Conseyería de Cultura, Política Llingüística y Deporte convocó una  edición nueva del programa Llaboral Cinemateca Curtios pa promocionar y distribuir la producción audiovisual asturiana. Esta iniciativa impulsa la difusión de los trabayos fechos per creadores cinematográficos asturianos o con residencia nel Principáu nos circuitos cinematográficos nacional y internacional.

    D’esta forma, al traviés d’esti proyectu avánzase na profesionalización de les industries culturales, con enfoque especial nel sector audiovisual. A esta convocatoria van poder presentase toos los trabayos producíos dempués del 1 de xineru del 2023.

    Les inscripciones van tar abiertes dende’l llunes, 3 de xunu, hasta les 23:59 hores del vienres 14 de xunu. Les bases completes d’esta convocatoria y el formulariu d’inscripción tán disponibles na web www.laboralcinemateca.es

    Na escoyeta de curtiumetraxes va valorase la orixinalidá y el riesgu de la propuesta, la calidá artística y técnica del trabayu, y la participación significativa del equipo técnicu y artísticu asturianu. Los curtios escoyíos van pasar a formar parte del catálogu de distribución de Llaboral Cinemateca que, a lo llargo de dos años, va encargase de la inscripción y presentación curiada y personalizada de los trabayos nos eventos y festivales más destacaos.

    Llaboral Cinemateca Curtios ye’l proyectu de distribución de curtiumetraxes asturianos de Llaboral Cinemateca, l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Deporte al traviés de Llaboral Ciudá de la Cultura.

  • La tradición y la música viaxen a Somiedu

    La tradición y la música viaxen a Somiedu

    La Pola Somiedu va acoyer del 28 de xunu al 1 de xunetu de 2024 la primer edición del Llar Trad Fest, que promete ser una esperiencia tresformadora pa los amantes de la música folk y tradicional. Entamáu pola Asociación Cultural Llar Folk cola collaboración del Ayuntamientu de Somiedo, esti festival tien l’oxetivu de fomentar el deprendizaxe y la promoción de les músiques tradicionales tanto asturianes como d’otres rexones del Arcu Atlánticu, poniendo especial procuru nel intercambiu intercultural, la creación de comunidaes y la tresmisión interxeneracional de conocimientos.

    El festival cuntará con 30 profesores de seis países, que van compartir los sos conocimientos en diez especialidaes musicales: guitarra/bouzouki, vigulín, xiblata, whistles, gaites, percusión, bodhran, curdión, cantu y baille tradicional/pandereta, amás d’un programa pa la reciella.

    Ente’l profesoráu podemos atopar nomes destacaos como Michael McGoldrick (Reinu Xuníu/Irlanda), Jean-Michel Veillon (Bretaña), Anxo Lorenzo (Galicia), Pepín de Muñalén (Asturies), Xosé «Ambás» (Asturies), José Manuel Tejedor (Asturias), Xisco Feijoó (Galicia), Xel Pereda (Asturias), Liz Doherty (Irlanda), Josephine Marsh (Irlanda), Simon Bradley (Escocia) o Fin Moore (Escocia).

    Demientres les 4 nueches y 3 díes de programación alcontramos:

    • Masterclases pa dellos niveles d’habilidá.

    • 3 nueches de conciertos de folk con grupos asturianos y internacionales, como Felpeyu, José

    Manuel Tejedor Trio o Michael McGoldrick entre otros.

    • Nueche en Danza.

    • «Slow Sessions» (introducción a les sesiones de música folk).

    • Taller d’escanciáu de sidra.

    • Alderiques y meses redondes.

    • Programa infantil, enfotáu en despertar l’interés de los más mozos pola cultura y la música tradicional d’un xeitu llúdicu y divertíu, ayudando amás a la conciliación familiar durante l’eventu.

  • Gulpiyuri, ente les 100 meyores sableres del mundu

    Gulpiyuri, ente les 100 meyores sableres del mundu

    Una encuesta ellaborada pola web Beach Atles asitia a un arenal del oriente asturianu, ente los cien meyores de tol mundu. Trátase de la sablera de Gulpiyuri, en Llanes, qu’amás ye una de les sableres más pequeñes del mundu.

    La sablera asturiana ta asitiada nel puestu 26 nuna llista de 100 llugares nes qu’apaecen otres dos sableres del estáu español: la sablera de la Barceloneta y la sablera d’En Bossa. Pa realizar esti llistáu, el Golden Beach Award 2024, tuviéronse en cuenta criterios como l’estilu de vida de la contorna, el significáu cultural o’l valor que tien la sablera pa la comunidá local. La llista destaca de Gulpiyuti que «nin siquier ta xuntu a la mar. Esta sablera ye un paraísu con solu 40 metros de sable, escondíu nel interior»

     

  • Asturies endurez los requisitos pa les viviendes turístiques

    Asturies endurez los requisitos pa les viviendes turístiques

    El Gobiernu d’Asturies aprobóun cambéu llegal pa endurecer los requisitos que dexen poner en marcha viviendes d’usu turísticu (VUT) y reforzar los mecanismos de control sobre esti tipu d’agospiamientos. El cambéu busca adaptar l’actual Llei de Turismu a les esixencies del mercáu, mesmo qu’aumentar la calidá y competitividá d’un sector clave pa la economía. El propósitu final ye garantizar una meyor ordenación de los negocios turísticos, pa lo que se tuvieron en cuenta les propuestes plantegaes pol empresariáu, los axentes sociales y los conceyos.

    El proyectu normativu recueye delles llimitaciones, por casu, establez que les viviendes d’usu turísticu tendrán d’arrendase íntegramente; esto ye, que nun van poder contratase per habitaciones. Tamién van tener que cumplir determinaos requisitos d’accesibilidá y sostenibilidá. Amás, nengún pisu sometíu a réxime de protección pública o protección oficial va poder comercializase como vivienda d’usu turísticu.

    Esta actividá económica va tener que cuntar con autorización espresa de les comunidaes de vecinos, que van poder torgar l’establecimientu d’esti tipu de negocios nos sos edificios si asina s’establez nos estatutos de la comunidá o por alcuerdu de la mayoría. El plazu pa cumplir esti requisitu ye de seis meses.

    Per otra parte, estos pisos tendrán d’esibir nun llugar destacao y visible una placa identificativa de la so condición de VUT, según el so númberu d’inscripción nel Rexistru d’Empreses y Actividaes Turístiques del Principáu. Tamién tendrán d’amosar estes identificaciones en toles páxines web y en cualquier soporte físicu nel que se promocionen.

  • Xixón plantea un branu a la romana

    Xixón plantea un branu a la romana

    Los Museos Arqueolóxicos de Xixón proponen un completu Programa d’Actividaes de Branu, que se va desenvolver mientres los meses de xunetu, agostu y setiembre de 2023 nel Parque Arqueolóxicu-Natural de la Campa Torres, y nel Muséu de la Villa Romana de Veranes, coles mires d’espublizar la cultura ástur-romana y promocionar el patrimoniu arqueolóxicu de la ciudá.

    Toles actividaes d’esti programa son de baldre y hai dende visites guiaes a teatru y música, ente otres munches propuestes. Puedes consultar el programa completu calcando equí.

  • Cuitu Negru y Llagos de Cuadonga, finales de La Vuelta n’Asturies

    Cuitu Negru y Llagos de Cuadonga, finales de La Vuelta n’Asturies

    Asturies volverá ser protagonista, coles llegaes al Cuitu Negru y Llagos de Cuadonga, de la próxima edición de La Vuelta, que va pasar pela comunidá ente’l 31 d’agostu y el 3 de setiembre. La organización destacó’l pesu que va tener la comunidá na ronda ciclista mientres la presentación de les etapes asturianes.

    El primer contactu de La Vuelta con Asturies va ser el 31 d’agostu, cuando los corredores van entrar a la comunidá nel intre de la etapa que va xunir les localidaes llioneses de Villafranca del Bierzo y Vil.lablinu. Van facelo mientres 81 kilómetros, en xubiendo pela so vertiente sur el puertu de Zarréu pa dirixise a Cangas del Narcea, onde van xirar escontra’l puertu de L.leitariegos, camín de la meta na capital de la contorna de L.laciana.

    Al otru día, el 1 de setiembre, el pelotón va salir de L’Infiestu y va enfrentase a una curtia (142 kilómetros) pero dura etapa de monte qu’inclúi dos ascensos al puertu de la Colladiella, de primera categoría, y llegada n’altu al Cuitu Negru, el techu de la estación d’esquí de Valgrande-Payares, con 1.843 metros d’altitú y de categoría especial.

    Loscorredores van disponer el 2 d’agostu d’una xornada de descansu pa siguir el día 3 cola postrera de les etapes asturianes, con salida en Lluanco. El percorríu, de 181 kilómetros, inclúi’l pasu polos altos del Fitu y Collada Llomena, de primera categoría, y conclúi col emblemáticu ascensu a los Llagos de Cuadonga, de categoría especial.

  • Patrimoniu autoriza una campaña d’investigación nueva na cueva de Tito Bustillo

    Patrimoniu autoriza una campaña d’investigación nueva na cueva de Tito Bustillo

    La comisión permanente del Conseyu del Patrimoniu Cultural d’Asturies informó güei favorablemente sobre la campaña d’investigación nueva na cueva de Tito Bustillo, en Ribeseya. Nel mesmu conceyu onde s’alluga esti xacimientu d’especial relevancia histórica, l’órganu autonómicu, que s’axuntó esta mañana, autorizó la continuación de los trabayos arqueolóxicos na cueva d’El Cierru.

    En total, la comisión permanente analizó 73 espedientes rellacionaos con autorizaciones d’intervenciones en bienes culturales protexíos allugaos nel Principáu d’Asturies.

    Igualmente, autorizáronse diferentes proyectos d’arqueoloxía de xestión, colos que se garantiza que la construcción d’infraestructures o la realización d’aprovechamientos maderables n’espacios asitiaos en xacimientos arqueolóxicos o nel so entornu de protección, se lleven a cabu de manera que se salvaguarden los elementos d’interés patrimonial que pudieren esistir nos mesmos.

  • Izquierda Xunida pide midíes que pongan frenu a la turistificación de Cimavilla

    Izquierda Xunida pide midíes que pongan frenu a la turistificación de Cimavilla

    El voceru municipal d’Izquierda Xunida – Más País – Izquierda Asturiana, Javier Suárez Llana, pidió güei al Gobiernu municipal “midíes urxentes que pongan frenu a la turistificación de Cimavilla” frente a lo que considera “una fueya de ruta que roba’l barriu a les vecines y los vecinos p’apurrí-ylo a la industria del turismu”. Suárez Llana considera que los planes municipales pal barriu “tán espulsando al vecinderu pa convertir el cascu históricu nun parque temáticu” al centrar el gruesu de les inversiones del Consistoriu na recuperación d’elementos del patrimoniu históricu pal so usu con fines turísticos.

    “Nenguna de les actuaciones anunciaes pa Cimavilla ta pensada pa les persones que viven nun barriu que dende l’añu 2006 nun dexó de perder población”, un fenómenu que’l conceyal d’IX-MP-IAS achaca “a la presión especulativa sobre les viviendes y los locales en planta baxa pal so usu turísticu, pero tamién a l’ausencia de servicios públicos”. Nesti sentíu, Suárez Llana enfea que “mientres el Conceyu recupera espacios nel barriu pal turismu, les persones mayores de Cimavilla siguen ensin tener un llugar onde axuntase y socializar, los mozos nun cunten con sala d’estudiu nin asociaciones del barriu, como la de festexos, con un llugar onde desenvolver la so actividá”. Un centru de salú, tresporte públicu o espacios nos que pueda desenvolvese actividá comercial de proximidá completen les necesidaes más reivindicaes polos vecinos del barriu, énte les que’l conceyal d’IX-MP-IAS considera que “la respuesta municipal nun puede ser la d’empobinar la ensin dulda necesaria recuperación de patrimoniu históricu y cultural a cubrir les necesidaes de quien visita’l barriu y non de quien vive n’él”.

    Poro, el conceyal d’IX-MP-IAS encamentó al Gobiernu a priorizar actuaciones “con visión de barriu”, como por casu la reforma de les viviendes públiques cedíes por VIPASA destinaes a arriendu afayadizu pa mozos. “El Gobiernu anterior dexó redactáu’l proyectu de reforma pal bloque de la cai Rosario, solo hai que licitalu”, afirma’l conceyal, que llamenta que nesti casu “el Gobiernu nun tenga l’axilidá que sí tien pa tramitar los cambeos urbanísticos necesarios pa la construcción del hotel de luxu del Muelle”.

    “Cimavilla precisa un plan de rexeneración urbana que dea una respuesta integral a les necesidaes vecinales y que faiga compatible la so singularidá como cascu históricu cola vida nel barriu, xusto lo contrario a lo que se ta faciendo dende’l Gobiernu municipal”, conclúi Suárez Llana.

  • Una quema en Sobrescobiu dexa dos vehículos quemaos

    Una quema en Sobrescobiu dexa dos vehículos quemaos

    Efectivos de Bomberos del Serviciu d’Emerxencies del Principáu d’Asturies (SEPA), con base nos parques de Samartín del Rei Aurelio y Llamorgal, amás del Xefe de Bomberos de la Zona Centru pararon la quema declarada nuna vivienda en Sotu d’Agues, en Sobrescobiu. Según los datos facilitaos pol Serviciu d’Atención Médica Urxente (SAMU) dos persones, una muyer y un varón, resultaron intoxicaos por inhalación de fumu y fueron treslladaos al Hospital Valle del Nalón.

    El Centru de Coordinación d’Emerxencies recibió l’avisu a les 2:55 hores d’esta madrugada. Na llamada indicóse qu’había fueu na cochera d’una casa de dos plantes. Na vivienda había dos persones, na segunda planta, que nun podíen salir. Nel momentu movilizóse a los efectivos de bomberos citaos que se treslladaron con un vehículu nodriza, una autobomba forestal, una autobomba urbana y una autoescalera.

    Una vegada nel llugar, los bomberos atacaron la quema qu’afectaba a la cochera, utilizando dos llinies d’agua dende l’esterior, y coles mesmes tuvieron enfirando la ventana del espaciu de la casa na que s’abellugaron, a la espera de ser rescataos, los residentes de la vivienda. En zarrándose nesi espaciu y tapando les rendixes pa que nun entrara’l fumu, dambos aguardaron a ser rescataos mientres apagaben el fueu. Colos equipos de respiración autónoma, los bomberos entraron nel inmueble y sacaron a dambes persones, una muyer y un varón.

    Los efectivos de bomberos dieron per desaniciáu la quema a les 4:22 hores. El fueu xamuscó’l garaxe y dos vehículos, amás de provocar el colapsu del forxáu ente la cochera y la primer planta de la vivienda. El restu del inmueble viose afectáu pol fumu.