El presidente d’Asturies, Adrián Barbón, anunció esti domingu la so intención de promover una llei autonómica que regule oficialmente’l Día de la Bandera d’Asturies y les reconocencies venceyaes a esta conmemoración, col envís de consolidar institucionalmente el 25 de mayu como una fecha clave nel calendariu del Principáu.
Barbón presidió l’actu institucional col que se conmemora’l día 25 de mayu de 1808, fecha na que’l pueblu asturianu decidió dir a les armes contra l’exércitu de Napoleón. Col llevantamientu, la Xunta foi la primer institución española que proclamó la soberanía popular. Les tropes asturianes tomaron como enseña l’actual bandera d’Asturies.
Mientres la so intervención, apostó por convertir el Día de la Bandera “nuna convocatoria escontra’l porvenir, que pasa por cuntar cola mocedá, por facela protagonista y asitiala nel centru del nuesu proyectu como sociedá”.
El xefe del gobiernu resaltó la importancia histórica d’esos acontecimientos pa proyectalos escontra’l futuru. “Trátase de que la bandera pase de mano en mano y ondee con fuerza en brazos nuevos como símbolu de l’Asturies que compartimos y queremos construyir: l’Asturies que se convirtió nuna tierra d’oportunidaes, l’Asturies afayadiza, abierta y solidaria, a la que cada vez lleguen más persones a vivir y trabayar”, destacó. Tamién convidó a la sociedá a rexuntase agora pa “trabayar de forma colectiva, con una enraigonáu sentíu d’unidá y pertenencia, pa facer realidá día a día una Asturies meyor”.
Nesta edición, la quinta desque’l Gobiernu d’Asturies decidió declarar el 25 de mayu como Día de la Bandera, cuntó cola participación del equipu asturianu AsturExplorers, ganador d’un desafíu mundial convocáu pola NASA pa crear aplicaciones móviles. Coles mesmes, sonó la nueva versión de la Marcha de Brañes, creada pol gaiteru Xuacu Amieva en collaboración col mozu artista multidisciplinar Ferla Megía.
