Adrián Barbón, anunció güei nel plenu de la Xunta Xeneral un principiu d’alcuerdu cola plantiya de Itvasa “que plantega soluciones concretes” y pondría fin al conflictu na empresa pública d’inspección de vehículos, que los sos trabayadores lleven en fuelga dende payares.
Mientres la vez de respuestes a los grupos parlamentarios, el xefe d’Executivu avanzó que les negociaciones van siguir esta tarde, nuna xunta que va tener llugar nel Serviciu Asturianu de Solución Estraxudicial de Conflictos (Sasec), pa zarrar los últimos detalles del alcuerdu, con cuenta de los trabayadores de la compañía puedan votar mañana y decidir si ponen fin a les movilizaciones.
La última propuesta del gobiernu presentada la selmana pasada incluyía en llinies xenerales dos parámetros: la meyora retributiva de la plantiya, con una xubida d’unos 1.500 euros brutos añales al traviés d’un nuevu plus de 107 euros al mes, y l’establecimientu de la xornada de 35 hores a partir del 1 de mayu. Dambes midíes taben condicionaes a que se realizara una inspección más al día por trabayador (pasar de 14 a 15 inspecciones) y a rebaxar l’absentismu. Sicasí, los trabayadores refugaron mientres la fin de selmana estos planteamientos, que dexaben abierta la puerta a la negociación posterior de midíes adicionales.
