El presidente asturianu, Adrián Barbón, anunció la so intención d’estender la gratuidá de la matrícula universitaria a tolos cursos y en tolos graos de la Universidá d’Uviéu, siempres que s’algame un rendimientu académicu determináu en primer cursu. Esta midida va incluyise na negociación de los presupuestos de 2026, asinia que podría aplicase yá en septiembre d’esi añu, al entamu del próximu añu académicu.
Na segunda xornada del alderique d’orientación política xeneral, el xefe del Executivu apostó por configurar un “auténticu sistema educativu públicu y gratuitu dende Les escuelines hasta rematar la formación universitaria”. Esti foi unu de los catorce nuevos compromisos asumíos por Barbón, tres los 52 qu’enunció na xornada d’apertura del alderique parlamentariu.
Otru de los principales anuncios ta venceyáu a la vía fiscal asturiana, una ferramienta cola que’l Gobiernu d’Asturies espera algamar un aforru de 70 millones pa les clases medies y trabayadores nes declaraciones de la renta correspondientes a 2024. P’afondar nesta llinia, van aumentase les deducciones nel IRPF por fíu a cargu, que se van asitiar en 600 euros pol primer descendiente –na actualidá son 500- y en 2.200 pol segundu, frente a los 2.100 vixentes. La llende de renta p’aportar a estes ventayes afítase en 35.000 euros, en declaración individual, y en 45.000 en declaración conxunta.
En relación col turismu, Barbón informó de que’l gobiernu va afaer la finca de Les Llanes, en Cuadonga, pa crear un aparcamientu disuasoriu cercanu a la basílica y una vía d’accesu piatonal.
Igualmente, destacó qu’a partir del próximu cursu va aplicase la xornada de 23 hores selmanales pal cuerpu de maestros y que se va crear una unidá d’ictus nel Hospital San Agustín, colo que toles árees sanitaries van disponer yá d’esti serviciu. Dambes iniciatives empobínense al refuerzu del estáu del bienestar, a diferencia d’otres comunidaes “nes que va retrocediendo día ente día”, según llamentó’l presidente.
