El presidente d’Asturies, Adrián Barbón, robló esta mañana los convenios pa la puesta en marcha de les primeres escueles d’educación infantil de titularidá autonómica. L’actu, nel que participaron alcaldes, alcaldeses o representantes de 28 de los 30 conceyos beneficiaos, convirtióse nel pistoletazu de salida de les escuelines, “un proyectu qu’asitia a Asturies a la vanguardia d’España nesti serviciu educativu”, según enfatizó el xefe del Executivu.
El Gobiernu d’Asturies va empecipiar anguaño’l desenvolvimientu de la rede d’escueles autonómiques de 0 a 3. L’oxetivu ye qu’al rematar la llexislatura toos estos centros públicos, incluyíos los qu’agora dependen de los conceyos, pasen a ser titularidá de l’Alministración d’Asturies, integraos nel sistema educativu y con una xestión homoxénea. Amás, a partir de setiembre la matrícula va ser dafechu gratuita nes escueles públiques.
Barbón y la conseyera d’Educación, Lydia Espina, coprotagonizaron la suscripción de los alcuerdos colos conceyos. Pal presidente, les escuelines constitúin “el proyectu tresformador más singular del mandatu”. Xustificó esta afirmación con cinco argumentos de pesu:
- Impulsu demográficu, en cuanto “tamos dando un saltu de xigante para ayudar a afitar población nel mediu rural”.
- Afitamientu del estáu de bienestar, porque “les escuelines constitúin un serviciu públicu de peraltu valor social”.
- Meyora de la conciliación de la vida familiar y llaboral, pos “ensin esti sólidu sofitu, munches madres y padres tendríen series dificultaes pa incorporase al mercáu llaboral”.
- Refuerzu a la cohesión territorial, por culpa de que la rede “ta concebida buscando l’equilibriu ente l’oriente, el centru, les cuenques y l’occidente; amás, nel so diseñu empréstase especial atención a la zona rural”.
- Aumentu del sentimientu d’enraigonase, porque “la escolarización nun mesmu centru hasta los 12 años va apurrir un sentíu de pertenencia al alumnáu”.
Les escuelines van empezar a funcionar en septiembre en 30 conceyos, con un máximu de 822 places distribuyíes en 54 unidaes. El procesu va siguir los próximos años hasta arrexuntar tolos centros públicos, agora distribuyíos en 46 conceyos, na rede autonómica
