El presidente d’Asturies, Adrián Barbón, garantizó ayeri que la Llei de Cultura y Identidá que ta rematando la Conseyería de Cultura, Política Llingüística y Deporte va promover derechos y va blindar les llingües propies d’Asturies. “Al curiar el nuestru patrimoniu, curiamos tamién la esencia d’esta tierra, los cimientos de la nuestra bandera. Esa llei tamién tien de ser motivu d’arguyu”, señaló.
Barbón participó esta tarde nel actu institucional de conmemoración del 25 de mayu de 1808, fecha na que la Xunta Suprema declaró oficialmente la guerra a Napoleón pola invasión d’España. Aquel acontecimientu dio orixe a la bandera d’Asturies. La comunidá conformó entós un exércitu pa defender la llibertá y la independencia y, al buscar un símbolu que lu representara, recurrió a la carta que l’ilustráu Gaspar Melchor de Xovellanos escribiera unos años enantes, en 1794, al marqués de Camposagrado. Naquella misiva, el xurista xixonés definía cómo teníen de ser, según la historia, la bandera y l’escudu d’Asturies. “Ehí empezó la historia d’amor d’Asturies cola so bandera, va 218 años”, recordó’l xefe del Executivu.
Mientres la so intervención, na qu’utilizó’l castellán, l’asturianu y l’eonaviegu, refirióse al arguyu de pertenencia como “valor esencial pa collaborar nel desenvolvimientu de la comunidá” y reivindicó la importancia d’enseñala asturiana, “acoyedora y abierta al mundu, pegada a la tierra, pero con vocación universal”.
“Ondee onde ondee, el pañu azul cola so cruz mariella trespórtanos a los paisaxes d’esta tierra, les sos xentes, les sos costumes y la so historia. Ye muncho más qu’un potente reclamu visual: ye símbolu d’identidá y memoria colectiva, un emblema que llevamos con arguyu hasta los llugares más recónditos del planeta”, señaló Adrián Barbón.
L’actu cuntó cola participación de dos alumnos del IES Doctor Fleming, d’Uviéu, encargaos de lleer la carta de Xovellanos al marqués de Camposagrado, y de los nueve estudiantes que van representar a Asturies na Ruta Quetzal 2026, que recoyeron la bandera de la comunidá que-yos va acompañar nel so viaxe.
“Sirva esta xornada pa celebrar l’aciertu nel diseñu d’una bandera que nos identifica y trescálanos ellí onde tea. Fagamos que, en díes como güei, lluza cada vez en más balcones, ventanes, muñeques y mástiles”, animó’l presidente.
