El presidente d’Asturies, Adrián Barbón, intervieno na tarde d’ayeri nel actu d’apertura del Congresu Mundial de Cultura Asturiana (CMCA 2025), nel qu’animó a afondar nel arguyu d’identidá pa caltener los principales valores de la tradición. “Esi ye’l camín pa reconocer, blindar y facer que perdure tolo bono y singular que podemos apurrir dende esta tierra. Dende’l patrimoniu material al más vulnerable de toos: l’inmaterial, onde va l’alma, la hestoria y la vida de les persones”, señaló.
Mientres la so intervención nel foru qu’impulsa l’Academia de la Llingua Asturiana (ALLA), Barbón valoró la pluralidá llingüística de la comunidá ya incidió en que, tres décades de desenvolvimientu cultural y educativu, ye’l momentu de dar el siguiente pasu y reconocer la oficialidá de la llingua asturiana y l’eonaviegu. “Esto nun ye namás una cuestión de xusticia y derechos, sinón una oportunidá pa construyir una Asturies más xusta, plural ya inclusiva”, precisó.
«La oficialidá ye’l futuru que merecemos y defendemos dende’l gobiernu d’unidá progresista y reformista”, remató.
Nel so discursu, el xefe del Executivu repasó dalgunos de los finxos históricos que contribuyeron a la defensa de la cultura y les tradiciones asturianes. Nesti sentíu, refirióse al interés de Xovellanos y d’otres figures de la Ilustración “por volver los güeyos a composiciones populares, cantares, refranes y palabres”. Tamién recordó’l llabor que desenvolvió va 50 años l’asociación Conceyu Bable: “Acertó dafechamente al devolver a Asturies dos coses: la importancia patrimonial de la so llingua como ferramienta de comunicación y l’interés poles manifestaciones culturales que s’espresen nella”.
Amás, Barbón aportunó na importancia de la enseñanza de la llingua asturiana nes aules dende va 40 años, mesmo que nos procesos alministrativos que punxo en marcha’l Gobiernu d’Asturies pa protexer diverses manifestaciones singulares como les dances tradicionales, el teatru asturianu o les mazcaraes d’inviernu.
