“Nun podemos escaecer que güei en Palestina siguen morriendo neños y neñes, si non poles bombes, pola fame”. Con esta frase, el presidente d’Asturies, Adrián Barbón, apeló a la conciencia colectiva y a la necesidá de caltener viva la solidaridá internacional col pueblu palestín. El xefe del Executivu pronuncióse nestos términos mientres la entrega del Premiu Emilio Barbón a l’Axencia de Naciones Xuníes pa los Refuxaos de Palestina (UNRWA), nun actu celebráu en Llaviana que sirvió como homenaxe y denuncia énte la grave situación humanitaria en Gaza.
Na so intervención, Barbón denunció la doble vara de midir na comunidá internacional, al recordar que mientres Rusia foi espulsada de competiciones deportives pola invasión d’Ucrania, Israel sigue participando nelles magar les consecuencies devastadores de la so ofensiva sobre Gaza. “Lo que ta asocediendo en Palestina ye un xenocidiu, y non cabe otra palabra”, sentenció.
El presidente sorrayó la estrema densidá de población na Franxa de Gaza, comparándola colos conceyos asturianos de Siero y Llanera, y precisó que más del 90% de les infraestructures fueron destruyíes o gravemente estropiaes, incluyíos hospitales, escueles y residencies de mayores. “Unu de los oxetivos principales de los ataques fueron les árees maternu-infantiles, lo qu’evidencia xuna intención clara d’esterminiu”, sollertó.
Barbón tamién indicó que’l Conseyu de Gobiernu aprobó esta mañana una ayuda estraordinaria de 200.000 euros destinada a l’atención humanitaria en Palestina, canalizada al traviés de la UNRWA. “Frente al abandonu de grandes potencies como Estaos Xuníos, Asturies reafita’l so compromisu colos derechos humanos y la solidaridá internacional”, valoró.
El presidente tamién quixo dexar claro qu’esi sofitu al pueblu palestín nun implica respaldu a organizaciones como Hamás, y remembró la so implicación n’actividaes de memoria del Holocaustu. “Precisamente por defender siempres la memoria del esterminiu del pueblu xudíu, resúltame entá más terrorífico que quien lo sufrieron agora tean esterminando a otru pueblu humilde ya indefensu”, llamentó.
La entrega del premiu celebróse en Llaviana, con una xornada de música en directu de 12 hores como símbolu de sofitu y alcordanza. Barbón concluyó la so intervención apelando a la conciencia colectiva: “Nun podemos escaecer. Güei siguen morriendo. Anque solo seya por eso, merez la pena lluchar”.
