“Reivindicar la memoria ye la meyor vacuna por que la intolerancia nun vuelva prender nel nuesu país”. Asina lo afirmó na tarde d’ayeri el secretariu xeneral de la FSA-PSOE y presidente del Principáu, Adrián Barbón, na so intervención nel actu d’apertura de les xornaes ‘Gijón / Xixón, una ciudá con memoria’ qu’ente güei y ayeri celébrense de forma telemática. “Nun podemos vencer na defensa de la memoria frente a una estrema derecha que quier romper los consensos”, indicó.
Una estrema derecha, anotó Barbón, que busca romper los consensos sociales n’ámbitos como la memoria o la igualdá, con propuestes como la que s’acaba d’impulsar nel Conceyu de Madrid pa retirar les cais y les reconocencies a Indalecio Prieto o Largo Caballero. “Ye una barbaridá intentar equiparar a los golpistes franquistes, qu’instauraron un réxime de terror que s’enllargó mientres 40 años, con figures hestóriques comprometíes cola democracia y la llibertá como fueron Indalecio Prieto y Largo Caballero”, aprofió’l secretariu xeneral de la FSA-PSOE na so intervención.
Remarcó Barbón que “nun se puede echar per tierra” el legáu y la trayectoria de referentes hestóricos como Prieto o Largo Caballero, y llamó a trabayar en tolos ámbitos na defensa de la memoria. Una defensa de la memoria, insistió, que representa la meyor forma de garantizar “que los errores del pasáu nun se repitan”.
“A quien dende l’estremismu ataquen la memoria vamos responde-yos con argumentos y hestoria”, anotó Barbón, qu’incidió en que de nenguna manera la reivindicación de la memoria democrática busca reabrir feríes sinón “ayudar a que los repulgos qu’entá tán abiertes ciérrense”, pa mirar al futuru como yá fixeron otros países como Alemania.
