Efectivos de Bomberos del Serviciu d’Emerxencies del Principáu d’Asturies, con base nel parque de Mieres, estinguieron, ayeri nueche, una quema nuna vivienda de dos plantes allugada nel extrarradiu, en Santa Clara, Mieres. La quema xamuscó por completu’l salón de la vivienda y el restu de la casa resultó afectada pol fumu.
El Centru de Coordinación d’Emerxencies del 112 Asturies recibió l’avisu a les 22.33 hores d’ayeri miércoles. Na llamada señalaben que taba quemando una casa de dos plantes con viviendes adosaes. Nun había persones afectaes. A les 23.05 los bomberos dieron la quema por controlada y a les 23.51 hores comunicaron que taba estinguío.
Per otru llau efectivos de Bomberos del SEPA con base nel parque de La Morgal, estinguieron tamién ayeri nueche, otra quema declarada nuna vivienda allugada en Meres, Siero. El fueu afectó a parte de la cubrición. El 112 Asturies recibió l’avisu a les 22.15 hores d’ayeri nueche. Esplicaba que tenía fueu nel teyáu de la so casa, un inmueble de dos altores. Darréu, una vecina indica que tán con dos mangones intentando apagalo.
A les 23.34 hores los bomberos controlen la quema y la dotación movida dende’l parque maliayo torna a base. A les 00.42 hores los bomberos movíos dende’l parque de La Morgal dan la quema por etinguío y retiren pa tornar a base. A primer hora d’esta mañana, por precuru, tornaron al llugar pa revisar cola cámara d’imaxes térmiques que nun hubiera nengún focu activu.
