Refuercen los ‘búhos’ ente Xixón, Uviéu y Avilés

El serviciu, qu'hasta la fecha namás s’emprestaba a los vienres y a los sábados, va empezar a funcionar tamién el restu de la selmana

0
242
Refuercen los búhos pa xunir Xixón con Uviéu y Avilés

El Consorciu de Tresportes d’Asturies (CTA) va poner en marcha de domingos a xueves llaborables mientres el branu un serviciu de ‘búhos’ ente Xixón, Uviéu y Avilés. Estes llínees, que van funcionar dende’l 7 de xunetu hasta’l 30 d’agostu súmense a les yá existentes los vienres y sábados. El preciu del billete individual va ser de 3 euros.

Los nuevos búhos, que van circular de domingos a xueves llaborales, van salir d’Uviéu dende les 11 de la nueche hasta les 5 de la mañana cada dos hores (23:00 / 01:00 / 03:00 / 05:00 hores), con regresu dende Avilés a la capital dende les 12 de la nueche hasta les 6 de la mañana, tamién cada dos hores (00:00 / 02:00 / 04:00 / 06:00 hores).

Los autobuses van salir de la estación d’Uviéu con trés paraes: estación autobuses de Xixón, El Muelle-Ambulatoriu y estación d’autobuses d’Avilés. En sentíu inversu, van salir de la estación d’autobuses d’Avilés, con paraes en Llano Ponte, estación d’autobuses de Xixón, Fernando Vela 12 (campus d’El Milán), y estación d’autobuses d’Uviéu.

Estos nuevos servicios súmense a los que yá operaben los vienres y sábados pela nueche, colos siguientes horarios:

Búho Uviéu-Xixón-Uviéu

Uviéu (dende les 23.30 hasta les 06.30 cada hora)

Xixón (dende les 23.00 hasta les 06.00 cada hora).

En xunetu y agostu son servicios cada media hora.

Búho Avilés-Xixón-Avilés

Xixón (dende la 23.30 hasta les 06.30 cada hora)

Avilés (dende les 23.00 hasta les 06.00 cada hora)

En 2018, un total de 56.062 persones, mayoritariamente mozos, fixeron usu d’estos trés servicios nocherniegos, que garanticen una mayor seguridá en desplazamientos munches vegaes venceyaos a actividaes d’ociu. El más demandáu foi’l d’Uviéu-Xixón-Uviéu con 26.536 usuarios, siguíu del Avilés-Xixón-Avilés, con 17.070 y del Avilés-Uviéu-Avilés, del que fixeron usu 12.456 viaxeros.