La cabalgata de Reis Magos de Xixón d’esti añu va salir de Montevil. La comitiva va entarmar el so percorríu a les 18 hores. El puntu d’entamu va ser la redolada de los colexos Montevil y Severo Ochoa. La marcha va percorrer les cais Río Eo, Pintor Manuel Medina, carretera Carbonera, avenida de Schultz, avenida Manuel Llaneza, cai 17 d’agostu, avenida de la Costa, San Bernardo, plaza del Institutu, Xovellanos, los Moros, Munuza, plaza del Carmen, Felipe Menéndez, Marques de San Esteban y Xardinos de la Reina rematando na plaza Mayor.
Ente les novedaes d’esta edición ta la incorporación d’una carroza con música en directu a cargu del grupu Petit Pop. Tamién s’incorporó una nueva banda de música, ‘La Tranvía de Xixón’, cola collaboración de la Comisión de Fiestes de Castiello Bernueces, y el grupu ‘Xente Xoven’ de la Guardia Civil. En total van participar más de 50 grupos, con más de 1.000 participantes, 9 carroces, 11 bandes o grupos musicales, amás d’exércitos, pastores, grupos d’hebreos, pastores, asturpatín, acróbates, etc. La organización encamienta a caltener la pertinente distancia de seguridá colos grupos y les carroces participantes y recuerda la prohibición d’usar espráis.
Melchor, Gaspar y Baltasar van desembarcar, xuntu col príncipe Aliatar, nel Puertu Deportivu de Xixón. La so llegada ta prevista pa les 11 hores del domingu 5 de xineru. De siguío van saludar a los neños dende la plaza del Marqués. A lo llargo de la mañana, sus maxestaes d’Oriente van percorrer delles cais de la ciudá nos sos coches oficiales. Y darréu, van ufiertar la so tradicional recepción nel Conceyu.
