Entamen un campamentu de branu n’asturianu

El campamentu va celebrase del 7 al 14 de xunetu nel Albergue La Casona Amarilla, l'antigua residencia d'Hunosa en Villamanín, Llión

0
494

L’asociación Iniciativa pol Asturianu ta acabante anunciar la puesta en marcha d’un campamentu de branu pa rapazos y rapaces de 6 a 16 años. El campamentu va celebrase del 7 al 14 de xunetu nel Albergue La Casona Amarilla, l’antigua residencia d’Hunosa en Villamanín, Llión. El campamentu organízase embaxo la xestión d’Abruja Ocio, con gran esperiencia na realización de campamentos. Va cuntar con un equipu de monitores que van facer que toles actividaes d’ociu a lo llargo de los ocho díes tengan por llingua vehicular l’asturianu.

El campamentu va cuntar coles actividaes tradicionales de los campamentos pensaos pa la mocedá, como gymkhanes, xuegos na piscina, miniquads, talleres… Pero amás, esti campamentu va tener delles actividaes especiales venceyaes a la llingua y cultura asturianes, tales como talleres de xuegos y deportes tradicionales, talleres sobre la hestoria d’Asturies.

El campamentu va cuntar con gymkhanes, xuegos na piscina, miniquads y talleres

Otru de los puntos fuertes d’esti campamentu n’asturianu ye la realización d’audiovisuales. Los neños van deprender los fundamentos básicos del trabayu audiovisual y van trabayar mano a mano con profesionales d’esti sector pa realizar proyectos de curtiumetraxes, videoclips y otres pieces d’esti tipu. Pa ello, van colaborar dende Cuatro Gotes Producciones, la plataforma de youtubers n’asturianu PlayPresta y la canal Alderiques d’Asturies.

El preciu del campamentu ye de 260 euros con too incluyío. Hai un descuentu de 230 pal segundu hermanu o segundu campamentu de branu con Abruja Ocio. Pa más información ya inscripciones tán a disposición los teléfonos 647 583 859 y 622 044 703, amás del corréu abruja@abrujaocio.com.