La escuela de 0 a 3 años ‘Los Gigantinos’ acoyó güei pela mañana la presentación de la campaña ‘Xugamos pa deprender’, qu’organizaba’l Serviciu de Normalización Ḷḷingüística de Cangas del Narcea, con motivu de la celebración del Día Internacional de la Ḷḷingua Materna, que se celebra cada 21 de febreru. Trátase d’una campaña que por cuartu añu consecutivu va enseñar de manera divertida vocabulariu n’asturianu a les más pequenes y los más pequenos. “Al traviés de los xuegos pueden deprender la ḷḷingua materna y cómo llamamos nesta zona a les partes diferentes del cuerpu”, dixo la edil d’Educación de Cangas del Narcea, Esther Fernández Somiedo.
La conceyala esplicó que nesta edición van enseñase las partes del troncu del cuerpu humanu, dando continuidá a les campañas pasaes, que yá enseñanon les partes de la cara, amás de los nomes n’asturianu de los animales del monte y de la casería. Un xuegu entreteníu, como pudieron comprobar les más pequenes y los más pequenos nel patiu de la escuela ‘Los Gigantinos’, ondese fixo la celebración del Día Internacional de la Ḷḷiguna Materna.
La responsable del Serviciu de Normalización Ḷḷingüística de Cangas del Narcea, Mónica Rodríguez, presentó tamién nesta xornada de celebración los cartelos de la fase II de la campaña ‘Asina los chamamos aiquí’. Una campaña que cunta con vocabulariu del dialectu occidental del asturianu relacionáu cola fauna y la flora de la zona y que va difundise nes redes sociales y mediante cartelos informativos que van mandase a los centros educativos de Cangas, Degaña, Ayande, Tinéu, Balmonte, Somiedu y Valdés. Esta campaña, que se fai por segundu anu consecutivu, «busca dar a conocer y fomentar l’usu de la nuesa ḷḷingua ente toda la población de la contorna».
Les actividaes que conmemoren la celebración del Día Internacional de la Ḷḷingua Materna van acabar el 15 de marzu, con una charla nel IES de Cangas del Narcea a las 10 horas, a cargu del filólogu, investigador y docente Ramón d’Andrés, quien foi Premiu Máximo Fuertes Acevedo d’Ensayu.
