Asturies va destinar más d’ocho millones a construyir un nuevu centru de Salú en Cangas al llau del Hospital Carmen y Severo Ochoa, lo que-y dexará disponer de los sos medios diagnósticos y pruebes complementaries pa emprestar a los usuarios una atención más rápida, segura y eficaz, basada en consultes d’altu resolvimientu.
El nuevu equipamientu va tener una superficie de más de 3.000 metros cuadraos, frente a los 777 del actual, y va cuntar con un área dedicada a la salú mental y con unidaes de fisioterapia, curiáu psicosocial y d’atención a la muyer, amás d’acoyer los servicios de salú bucodental. Va ser un centru más modernu, funcional y alcontradizu pa profesionales y pacientes.
La so construcción va dexar lliberar l’espaciu qu’ocupa l’actual centru de salú, allugáu nel interior del propiu hospital, que xunto coles árees qu’acoyíen les actividaes asistenciales que se van treslladar al nuevu, va faer posible la reordenación del Carmen y Severo Ochoa como un complexu d’especialidaes de la área sanitaria del suroccidente.
Toes estes actuaciones van recoyese nun nuevu plan funcional pa estos equipamientos, que preve que los dos niveles d’atención médica aumenten la so collaboración p’ameyorar el diagnósticu y resolvimientu de los problemes de los pacientes. Pa ello, el nuevu centru y l’hospital van tener actividaes compartíes y complementaries pa consiguir una prestación sanitaria de mayor calidá.
Salú espera cuntar col plan funcional nel primer trimestre del 2024, de manera que’l proyectu del nuevu centru y la so área de salú mental pueda llicitase a finales d’ese mesmu añu y empezar la construcción en 2026; con un plazu d’execución previstu de 20 meses, les obres taríen remataes en 2027.
