Carmen Suárez Suárez, conseyera d’Educación

Carmen Suárez Suárez (Xixón, 1953) ye la nueva conseyera d’Educación del Gobiernu d’Asturies. Llicenciada en Xeografía y Hestoria y doctora n’Hestoria pola Universidá d’Uviéu, onde realizó’l doctoráu interdisciplinar n’Estudios de la Muyer. Tamién ye llicenciada en Filosofía y Ciencies de la Educación pola Universidá d’Educación a Distancia (UNED), master n’Estudios de la Diferencia Sexual pola Universidá de Barcelona y Especialista en Polítiques pa la Igualdá na Alministración Pública.

Exerció como profesora de Secundaria n’Asturies (1978-1986) y como Inspectora d’Educación en Navarra. Dende 1990 y hasta marzu de 2019 foi inspectora d’Educación nel Principáu, a esceición del períodu 2000-2001, nel que foi xefa d’Igualdá d’Oportunidaes pa Muyeres y Homes del Institutu Asturianu de la Muyer. Forma parte de l’Asociación Feminista Clara Campoamor, de l’Asociación Española d’Investigación d’Hestoria de les Muyeres, de la Lliga Internacional de Muyeres pola Paz y la Llibertá y ye patrona de la Fundación José Barreiro.