El Conseyu d’Alministración del Centru de Tresportes de Xixón aprobó esti llunes por unanimidá un sistema de descuentos nes tarifes de tolos sos servicios. L’oxetivu ye contribuyir a la recuperación de l’actividá económica de les empreses y los autónomos qu’utilicen l’equipamientu tres la paralización de l’actividá del sector mientres l’estáu d’alarma.
El sistema de descuentos va ser gradual en función del amenorgamientu de la facturación ente’l 14 de marzu y el 20 de xunu. Va aplicase un primer descuentu mensual del 100% de les tarifes pa toles empreses, un segundu descuentu mensual del 100% pa les empreses qu’acrediten un amenorgamientu de la facturación de siquier el 33%, y un tercer descuentu mensual del 100% p’aquelles que vieren amenorgada la so facturación siquier un 66%. D’esta manera, los descuentos, con un calter progresivu, van poder algamar hasta un 25% de la cuota añal p’aquelles empreses y autónomos que vieren más afectada la so actividá.
Per otru llau, la sociedá aprobó la puesta en marcha de dos nuevos servicios: unu de guardería pa caravanes y autocaravanes y otru d’almacén de pequeñu formatu pa usuarios de les oficines. El serviciu d’estacionamientu de caravanes y autocaravanes va tar disponible tanto pa estancies temporales como llargues. Amás, l’equipamientu va recuperar el serviciu de cafetería, que va ser axudicáu una vegada remate’l plazu de presentación d’ufiertes el próximu 3 de xunetu.
El conceyal de Mediu Ambiente y Movilidá, Aurelio Martín, informó tamién al Conseyu d’Alministración de la evolución de la ocupación de les distintes instalaciones del Centru de Tresportes, qu’ente’l 31 d’avientu de 2019 y el 31 de mayu de 2020 amontó les sos cifres. En concretu, la ocupación de la zona de estacionamiento creció un 10,28%, la d’oficines un 12,50%, la de naves industriales un 19,8%, algamando’l 100% d’ocupación, y la de parceles un 26,25%.
