La Conseyería de Ciencia, Innovación y Universidá va dotar en 2023 a la Universidá d’Uviéu d’unu financiamientu históricu, con una medría cimera al 8%, que se traduz en 162 millones en conceutu d’aportación ordinaria, plan d’inversiones y pagu por oxetivos. El conseyeru, Borja Sánchez, presentó na Xunta Xeneral les cuentes del so departamentu, qu’inclúin l’estudiu técnicu pa treslladar facultaes y convertir El Cristu en “una gran ciudá universitaria”.
El proyectu de presupuestos de Ciencia para’l próximu exerciciu va cuntar con 228.094.247 euros, un 7,8% más qu’anguaño. La Universidá, l’impulsu a una digitalización que facilite la cohesión territorial y l’apueste pola innovación y l’excelencia investigadora son los exes sobro los que s’asientan los grandes programes de la conseyería.
Estabilidá financiera pa la institución académica
Les cuentes pa 2023 marquen l’entamu del nuevu contratu-programa que va dotar a la Universidá d’Uviéu d’un periodu d’estabilidá financiera de diez años (seis de conveniu prorrogables por otros cuatro). Pa esos seis primeros años van destinase más de 1.000 millones. El conseyeru punxo de relieve que se trata de “un financiamientu históricu, que supon 200 millones más que l’anterior contratu”.
Como puntu de partida, la institución académica va recibir el próximu añu cerca de 12 millones más pa funcionamientu, inversiones y meyora por oxetivos. A esti financiamientu hai qu’añedir más de 630.000 euros pa beques y ayudes universitaries, tantu d’estudios como pa la movilidá internacional, según distintes partíes pa servicios científicu-técnicos, fomentu de la investigación, cátedres universitaries o contratos predoctorales del programa Severu Ochoa, por casu.
Reubicación de sedes universitaries
El presupuestu inclúi 200.000 euros pa los estudios técnicos necesarios pa la restructuración y reubicación de sedes universitaries nel campus d’El Cristu. “Esta inversión demuestra’l firme compromisu del Gobiernu del Principáu cola Universidá d’Uviéu y el so Plan Estratéxicu, nel enfotu de qu’en El Cristu constitúyase una gran ciudá universitaria, qu’alique la vida socioeconómica del barriu, y que, con esti movimientu, favorézase tamién la unificación de sedes xudiciales en Llamaquique”, sorrayó Borja Sánchez.
Combatir la fienda dixital nel territoriu
El proyectu contempla más de diez millones, en gran parte procedentes de los fondos del Mecanismu de Recuperación y Resiliencia (MRR), pa combatir la fienda dixital, llevar la innovación al territoriu y ameyorar la conectividad n’empreses instalaes en polígonos y n’edificios públicos.
Nesti apartáu, destaquen 3,3 millones pa formar en competencies dixitales a la ciudadanía, una actuación que se va realizar en collaboración colos conceyos comenenciudos. Prevese ufiertar formación a más de 16.000 persones.
Amás, dedíquense 1,7 millones al aumentu de la velocidá de conexón en centros loxísticos y polígonos; 1,9 millones a la meyora d’infraestructures de telecomunicaciones n’edificios y daqué más de 530.000 euros pa bonos dixitales destinaos a colectivos vulnerables.
Per otru llau, el presupuestu inclúi 1,8 millones p’averar la digitalización y l’innovación al territoriu, al traviés de los Centros de Dinamización Tecnolóxica Local (CDTL) y, como novedá, 100.000 euros p’activar la Rede de Conceyos con Ciencia, en collaboración cola Federación Asturiana de Conceyos (FACC).
Impulsu pa la I+D empresarial y el talentu
Nel apartáu d’investigación ya innovación, Ciencia destina más de 43,7 millones a programes pa impulsar la I+D+i empresarial, desenvolver polos d’innovación de collaboración públicu-privada y fomentar l’atracción de talentu y la medría de personal científico.
Ente otros oxetivos, escuérrese reforzar l’ecosistema d’empreses de base tecnolóxica y poner en marcha nueves aceleradores públiques, privaes o públicu-quitaes d’empreses filiales (spin-offs), emerxentes (startups) y pymes innovadores.
El proyectu contempla tamién l’impulsu a la carrera investigadora, con 8,6 millones xestionaos pola fundación Ficyt pal fomentu de les vocaciones científiques y los programes Margarita Salas, Asturies, Xovellanos y ayudes a grupos d’investigación, ente otros, puestos en marcha en 2021.
Industria aeroespacial
Amás de programes emblemáticos como les Misiones Científiques, que van cuntar con una nueva convocatoria pal próximu añu, Ciencia va destinar 600.000 euros a la compra pública innovadora. L’oxetivu ye impulsar n’Asturies la industria aeroespacial venceyada a les telecomunicaciones al traviés de nanosatélites.
Na so intervención, Borja Sánchez apostó por aumentar el porcentaxe del Productu Interior Brutu (PIB) que s’invierte n’I+D col sofitu del Principáu, la Universidá y les empreses. Nesta llínea, indicó qu’a partir de 2023 Asturies va cuntar con ferramientes fayadices pa llograr amontar la inversión: el contratu-programa cola Universidá d’Uviéu y la futura Axencia de Ciencia, Competitividá Empresarial ya Innovación, que va dexar entamar meyor les convocatories y cuntar con un mecanismu afechu a les peculiaridaes de la xestión de la investigación na comunidá.
