La Conseyería de Ciencia, Innovación y Universidá va destinar cerca de 28 millones a impulsar la inversión privada en proyectos d’investigación, desenvolvimientu tecnolóxicu ya innovación y a consolidar los programes d’atracción y retención de talentu en 2022. Amás, el Principáu va reforzar el so apueste pola Universidá d’Uviéu, con un incrementu nel financiamientu y un cambéu lexislativu que va dexar ampliar la duración de futuros contratos-programa hasta los seis años.
El proyectu de presupuestos d’esti departamentu para’l próximu añu xube a 211 millones, un 6,1% más qu’esti, de los que 3,1 vienen de fondos europeos del Mecanismu para la Recuperación y la Resiliencia (MRR). La conseyera de Facienda, Ana Cárcaba, foi la encargada de presentar les cuentes na Xunta Xeneral en sustitución del titular de Ciencia, Innovación y Universidá, Borja Sánchez, ausente por enfermedá.
Refuerzu a la I+D+i empresarial
Unu de los oxetivos ye amontar de forma gradual la inversión privada n’I+D+i p’averala al 2% del PIB rexonal. Pa ello, va reforzase la tresferencia de capital al Institutu de Desenvolvimientu Económicu del Principáu (Idepa), con 12,4 millones, un 6% más. Esta partida va dedicase a les convocatories d’ayudes a la investigación ya innovación empresarial, la creación de centros d’I+D en grandes compañíes, el financiamientu per primer vegada d’hubs y la puesta en marcha de firmes de base tecnolóxica.
Nesta mesma llinia amóntase l’aportación al Centru Européu d’Empreses ya Innovación (CEEI) col fin de dinamizar el sector de nueves compañíes innovadores y collaborar con programes de emprendimiento empobinaos al sector agroalimentario y sanitariu.
Atracción y retención del talentu
L’afitamientu de los programes d’atracción y retención de talentu y el fomentu de les vocaciones científiques van cuntar con más de 15 millones, correspondientes nel so mayor parte al contratu programa cola Fundación pal Fomentu n’Asturies de la Investigación Científica Aplicada y la Tecnoloxía (Ficyt). Nesti apartáu enmárquense les convocatories de los programes Margarita Salas, Xovellanos, Asturies, I+D+i en rede, Open Labs o les ayudes a grupos d’investigación.
Misiones Científiques d’Asturies
Nel ámbitu de la innovación, el Principáu va llanzar una nueva edición del programa Misiones Científiques d’Asturies, tres l’ésitu alcanzáu anguaño con seis consorcios integraos por cerca d’un centenar d’empreses ya instituciones. Pa la segunda convocatoria destínense 800.000 euros nel proyectu de presupuestos.
Como novedá, y gracies a los fondos europeos del Mecanismu de Recuperación y Resiliencia (MRR), va poner en marcha una misión específica centrada na enerxía y l’hidróxenu verde, enmarcada nos planes complementarios en collaboración con otres comunidaes. Pa esta llinia, qu’encaxa cola misión d’amenorgamientu d’emisiones y gases d’efectu invernaderu, van destinase 1,8 millones en 2022, d’un total de 6.000.000 euros d’inversión.
Compromisu cola Universidá d’Uviéu
Al respective de la Universidá d’Uviéu, el proyectu de presupuestos inclúi un incrementu del 2,7% n’aportación ordinaria, la destinada a cubrir gastos de personal y corrientes, con más de 140,8 millones (3,7 más qu’anguaño). Sicasí, la institución lleva la mayor parte de los 159 millones del capítulu correspondiente a la Dirección Xeneral d’Universidá.
El compromisu cola Universidá va más allá y va quedar afiguráu nel nuevu conveniu de financiamientu que se va suscribir llueu y que va incluyir, ente otres partíes, 2,5 millones en conceutu de financiamientu por resultancies p’acciones qu’ameyoren la calidá.
Les cuentes recueyen tamién un cambéu adicional que va dexar que los futuros convenios y contratos-programa cola institución académica puedan tener una duración d’hasta 6 años. Esti cambéu va facilitar que puedan planiase y encetar proyectos, inversiones y reformes a más llargu plazu.
Amás de les partíes señalaes, nel presupuestu de 2022 figura’l plan d’inversiones, dotáu con 1,6 millones, y un incrementu de la compensación pol amenorgamientu d’ingresos derivada de la conxelación de matrícules en graos, másteres y doctoraos. En total, van destinar a la Universidá d’Uviéu más de 5,4 millones por esti conceutu.
Como novedá, habilítase xuna partida de 100.000 euros pa impulsar la acreditación d’unidaes d’excelencia científica María de Maeztu, un programa nacional qu’abre la posibilidá d’atraer fondos. Dientro del apueste pola excelencia investigadora amestada al ámbitu universitariu, tamién se financien con 550.000 euros l’Institutu Universitariu d’Oncoloxía del Principáu (IUOPA), y l’Institutu Mistu d’Investigación en Biodiversidá (IMIB), con 120.000 euros.
Acciones contra la brecha dixital
Nel apartáu de telecomunicaciones, la partida de 14,3 millones va centrase sobre manera nes acciones de meyora de la conectividad y l’implantación del bonu contra la brecha dixital, sofitaes por fondos europeos.
Tamién se contemplen proyectos como’l plan de captación de nómades dixitales, los programes sobro tecnoloxía 5G, les meyores nos centros emisores de TDT y l’impulsu a los llaboratorios d’innovación social, con 1,7 millones pa los Centros de Dinamización Tecnolóxica Local (CDTL) en concurrencia competitiva.
L’añu 2022 va ser tamién el de la puesta en marcha de l’Axencia de Ciencia ya Innovación, que va marcar un nuevu modelu de gobernanza nel ecosistema d’I+D+i. Como complementu, la conseyería preve empecipiar la integración de los centros tecnolóxicos coles mires d’avanzar escontra un gran centru alliniáu colos ámbitos de la Estratexa d’Especialización Intelixente.
