La segunda edición del Ciclu de Cine, Memoria y Xéneru, CIME, va celebrase del 21 al 23 d’abril na Antigua Escuela de Comerciu de Xixón. Con esta segunda edición, CIME consolida la so apuesta pol cine como ferramienta pa la reflexón social y la recuperación de la memoria, xenerando un espaciu d’alcuentru ciudadanu que convida a compartir y dialogar sobre cultura y hestoria.
La muestra articúlase en tres xornaes que combinen conferencies y proyecciones cinematográfiques: El martes 21 d’abril va abrir el ciclu la historiadora, documentalista y escritora xixonesa Pilar Sánchez Vicente cola conferencia La memoria como resistencia: muyeres silenciaes, una intervención centrada en recuperar el papel de muyeres clave na hestoria del sieglu XX n’España que fueron arrinconaes de los relatos oficiales. La xornada va siguir cola proyección de Las 13 rosas (Emilio Martínez-Lázaro, 2007), cola presentación al cargu de l’Asociación 13 Rosas Asturias.
El miércoles 22 d’abril, Gonzalo Barrena Díez va ufiertar la charra Infancies nel exiliu: los Neños de Rusia, en collaboración cola Asociación Neños de Rusia, abordando la historia de los miles de menores evacuaos a la Unión Soviética mientres la Guerra Civil española. A la conferencia va siguir la proyección del documental Los niños de Rusia (Jaime Camino, 2001).
El ciclu va rematar el xueves 23 d’abril con Aguya y látigu. Homenaxe a Federico García Lorca, una conferencia a cargu del poeta y docente Juan Carlos G. de los Reyes que conmemora’l 90 aniversariu de la muerte del autor. La sesión va incluyir un recital poéticu acompañáu al pianu por Marcos Suárez, con composiciones orixinales de Lorca. A lo último, va tener llugar la proyección de La novia (Paula Ortiz, 2015), una adaptación llibre de la obra Bodas de sangre del llexendariu poeta y dramaturgu.
Toles actividaes van entamar cada día a les 18 hores na Antigua Escuela de Comerciu.
