La conseyera d’Educación, Lydia Espina, y l’alcalde de Ribadeva, Jesús Manuel Bordás, anunciaron güei la próxima entrada en funcionamientu de la escuela de primer ciclu d’Infantil (0 a 3 años) de Colombres, nel edificiu asitiáu na parcela amiesta al Centru Públicu d’Educación Básica (CPEB) del conceyu.
Asturies formalizó esti mes la entrega al consistoriu del edificiu construyíu con esti fin en 2011 y executóse un arreglu en 2018 na so cubierta. Dambes obres taben pendientes de recepcionar.
Coles mesmes, la conseyería comprometióse a realizar una serie d’inversiones necesaries por que les instalaciones entren en funcionamientu, por un importe de 30.000 euros. Trátase de la construcción de contadores eléctricos na llende de la parcela, l’encargu de la conexón a la rede de saneamientu y el valláu perimetral de la pista deportiva, con un accesu independiente que dexe’l so usu fuera del horariu lectivu.
El conceyu, pela so parte, anunció que se va presentar a l’actual convocatoria de subvenciones xestionaes pola conseyería pa sufragar la creación de nueves places de 0 a 3 años y financiada con fondos europeos del Mecanismu de Recuperación y Resiliencia (MRR). En concretu, va allegar na llinia d’ayudes destinaes a la rehabilitación y adaptación d’edificios yá esistentes. La escuela de 0 a 3 años de Colombres va constar de dos unidaes y va tener 31 places, atendiendo al informe de necesidaes y al censu de población del conceyu.
