Conciertos, humor y talleres p’adultos, esti iviernu en Llaboral

El Teatru va acoyer dos pases del esitosu musical 'La Llamada' y los últimos shows de Dani Rovira, Berto Romero y Alex Clavero

0
59

La música centra les propuestes del iviernu en Llaboral Ciudá de la Cultura pal públicu xuvenil y adultu. El programa inclúi dos pases del musical La Llamada y trés cites colos monólogos más risonderos. El sábadu 11 de xineru’l colectivu Muyeres presenta Humanes nel Teatru de la Llaboral. Un discu y un espectáculu conformen esti nuevu proyectu global diseñáu y empobináu por Borja Roces. Muyeres siente la necesidá de siguir avanzando como colectivu musical y, per primer vegada na so trayectoria, los cantares d’esti nuevu trabayu nun son recuperaes de la música tradicional sinón que foi compuestes espresamente para Humanes.

Dani Rovira vuelve a los escenarios col so nuevu espectáculu ODIO. Los díes 18 y 19 de xineru, el cómicu andaluz va ufiertar dos funciones del so nuevu espectáculu de Stand Up Comedy onde, ensin censura dalguna, va poner enriba de la mesa la so visión más honesta y delirante del ser humanu de güei. Coque Malla va llegar al teatru’l vienres 24 de xineru pa presentar los temes del so últimu trabayu ¿Revolución? nun nuevu espectáculu, ambiciosu y cuidu, que llega cargáu de sorpreses. Trés compañíes emerxentes de danza contemporanea van actuar na Llaboral el sábadu 25 de xineru nel marcu del proyectu Xunta en Danza (REDE) al pie de los yá consagraos baillarinos de la compañía Martin Krego que, amás, van impartir el día antes un taller pa públicu adultu y nuevu a partir de 14 años.

Febreru va entamar col conciertu, el sábadu 1, de Paco Ibañez. El valencianu atópase de xira pa celebrar los 50 años de la so mítica actuación nel Olympia. Nella recupera los rescoldos del mayu del 68 pa ufiertar un pocu de calor a «estos tiempos de desorientación, ultraderecha y vacíu cultural». El vienres 7 lleguen Los Secretos y el so nuevu proyectu Mi paraíso, una selección de nuevos cantares col inconfundible estilu de Los Secretos.

Con una puesta n’escena íntima y personal, la cantante Zahara va ufiertar el 14 de febreru un conciertu único y especial nel que va interpretar dalgunes de los sos cantares de mayor carga emocional y con tintes melodramáticos y el día 28 va xubir a les tables del Teatru l’artista cántabru Nando Argüeros, que vuelve a la escena musical con un nuevu trabayu y el so Tour 20 Aniversariu. L’humor d’Álex Clavero pon el broche d’oru al mes de febreru, el sábadu 29, cola presentación del so show mimadreestrendingtopic, un hilarante monólogu nel qu’esplica les consecuencies de que la so madre tenga un smartphone.

El vienres 6 y el sábadu 7 de marzu llega al teatru La Llamada, un risonderu musical escritu y empobináu por Javier Ambrossi y Javier Calvo sobro la fe, l’amistá, el primer amor, el electro-llatinu y Whitney Houston. Yá s’escosaron les entraes pal conciertu que va ufiertar Sergio Dalma el 13 de marzu, nel que va presentar 30… y tanto, un proyectu col que quier celebrar les sos trés décades de carrera y presentar música nueva a los sos siguidores.

El Arrebato vuelve anováu a los escenarios y presenta col so nuevu discu Abrazos el sábadu 14 y, del 20 al 22, el showman Berto Romero va ufiertar nueves hestories, nuevos cantares y dalguna qu’otra sorpresa nuna risondera cita col espectáculu Mucha tontería. La programación pal públicu xuvenil y adultu de la Llaboral completase con un taller d’improvisación teatral impartíu pol colectivu Trivilorio Impro. Les dos sesiones nes que s’estrema esti taller van tar dedicaes a l’aceptación, escucha y capacidá de propuesta n’escena (sábadu 25 de xineru) y a les estructures narratives pa creación d’hestories improvisaes (sábadu 14 de marzu).

Sigue amás na iglesia, hasta’l domingu 12 de xineru, la esposición La palabra inacabada. L’artista visual García de Marina esquiza la relación ente’l llinguaxe visual y el llinguaxe escritu, y los percorríos empuestos a Llaboral Ciudá de la Cultura y xubíes al Mirador de la Torre.

El programa Vive Llaboral sigui sumando nueves actuaciones pal próximu añu y yá tán disponibles les entraes pa los conciertos del pianista James Rhodes, que va celebrar el 250 aniversariu de la nacencia de Ludwig van Beethoven con un conciertu bien especial, de India Martínez y d’Antonio José, que van presentar los sos nuevos trabayos, amás del espectáculu d’humor de Mota, Segura y Flo que lleguen a la Llaboral cola segunda temporada del so espectáculu Dos tontos y yo.

Les localidaes pa los conciertos y actividaes pueden adquirise na Recepción de Llaboral Ciudá de la Cultura, na Oficina d’Información Turística d’Asturies n’Uviéu (CITPA) n’Uviéu, nel Centru Niemeyer n’Avilés, entraes.liberbank.es, nel 902 106 601, na rede de caxeros Liberbank y en la mesma web de la Llaboral, www.laboralciudaddelacultura.com.