Seis ediciones coles que yá se consolidó como un eventu indispensable nel branu xixonés. Metrópoli, que se va celebrar del 28 de xunu al 7 de xunetu nel Recintu Ferial Luis Adaro de Xixón, concentra mientres 10 díes música, cine, televisión, cómics y entretenimientu para tola familia. La pasada edición, el festival algamó’l so récord con 350.000 visitantes (66% de visites de la rexón, 30% nacional y 4% internacional). Amás, mientres los dos fines de selmana que toma’l festival envalórase que se va llegar, otru añu más, al 100% de la ocupación hotelera.
El festival cunta anguaño con un cartelu musical únicu, coles actuaciones de Juanes, Andrés Calamaro, Beret, Camela, Ilegales, Felix Da Housecat, Mala Rodríguez, la batalla de los Gallos de Red Bull, Remember Queen, la Pegatina o Fuel Fandango. Estos y otros artistes van ufiertar conciertos en dos escenarios mientres los 10 díes del eventu. Y como ‘too ta en Metrópoli’, la primer fin de selmana va celebrase la Tatto Expo, colos meyores tatuadores del país.
Una de les mayores convenciones de comics
El conteníu de cine, televisión y cómics va concentrar del 4 al 7 de xunetu mientres la Comic Con. Anguaño Marc Singer, Donovan na serie V va ser unu de los protagonistes de Metrópoli y va ser la primer vegada que l’actor visite una convención española. Richard Brake, El rei de la nueche en ‘Xuegu de Tronos’ y Jimmy Vee, R2-D2 Star Wars, tamién van participar na convención con alcuentros y charres colos fans.
Tom Grummet, Howard Chaykin, Salva Espín o’l dibuxante d’El Jueves, Maikel, van formar parte del enorme elencu de dibuxantes que van pasar pola convención. Ente les actividaes más destacaes atópase’l Desfile de Superhéroes. Al clásicu desfile de Star Wars van xunise participantes d’otres sagues de ciencia ficción y superhéroes. Un desfile únicu nel nuesu país con más de 300 participantes.
Espectáculos, zona infantil, market y zona gastro
Los visitantes van poder pasiar poles distintes esposiciones como La Tierra del Anillo, Xuegu de Tronos, Expo Playmobil o Hollywood Cars, impresionantes coches que formaron parte de la hestoria del cine. L’humor tamién va tar en Metrópoli cola actuación de JJ Vaquero. Los más pequenos que van poder esfrutar del espectáculu ‘Tadeo Jones, una aventura musical‘. Y pa tomase un descansu, el festival cunta con un Market con espositores del Principáu y con una zona gastro con hosteleros de la ciudá.
Metrópoli, un festival sostenible
El festival presenta’l so conteníu nun programa de mano que nun s’imprimirá en papel, una de les midíes del plan de sostenibilidá que va desenvolver en collaboración con COGERSA y Ecovidrio. Metrópoli esta concenciáu col mediu ambiente y anguaño va dar un pasu más pa faer l’eventu más sostenible. Pa que tolos visitantes pueda xunise a la causa realizaránse talleres pa tolos públicos y van señalizase tolos puntos de reciclaje. Amás, van esaniciase los vasos de plásticu y les payines y van ponese a disposición de los usuarios vasos reutilizables. Van recoyese y se van reutilizar aceites. Amás, los trabayadores nun van utilizar botelles d’agua de plásticu, sinón que va haber agua pal equipu que van rellenar nos sos propios envases.
