La Conseyería d’Educación concluyó les obres de sustitución y arreglu de los forxaos de la planta baxa del Colexu Públicu Rei Pelayo, en Xixón. Técnicos de la Dirección Xeneral d’Infraestructures roblaron güei l’acta de recepción cola empresa Sardalla Española.
L’actuación, que foi axudicada en 360.000 euros, consistió nel arreglu estructural d’una superficie de 1.450 metros cuadraos. Tamién se sustituyó parte del pavimentu ya instaláronse rexilles de ventilación.
Amás, efectuáronse actuaciones complementaries que nun taben contemplaes nel proyectu. En concretu, el repintáu de tola planta baxa, la renovación de la rede de saneamientu, la sustitución de les cortines en cinco aules, la construcción d’un tabique en sustitución d’una mampara y el alicatáu de la antecocina.
El colexu queda agora a disposición del Conceyu de Xixón pa qu’acometa la mudanza del moblame y reasitie al alumnáu. El director xeneral d’Infraestructures y Tecnoloxíes Educatives, Julio Vallaure, púnxose en contactu col conceyal d’Infraestructures Urbanes, Gilberto Villoria, y cola directora del centru, Pilar Álvarez, p’anuncia-yos la recepción de la obra.
Vallaure caltuvo informáu al edil xixonés del desenvolvimientu de los trabayos. Coles mesmes, esistió una coordinación ente los técnicos de dambes alministraciones. Ello ye que delles actuaciones adicionales executáronse a pidimientu municipal.
Esta obra de rehabilitación acometióse de resultes del esbarrumbe del forxáu sanitariu de la planta baxa d’un aula del colexu’l 12 de xineru de 2023, antes del entamu de les clases. Los estudios encargaos con posterioridá revelaron la esistencia d’un deterioru que necesitaba una intervención en dichu nivel.
