Tres la muerte ayeri del Papa Xicu a los 88 años ábrese un procesu nel que los cardelanes de menos de 80 años han escoyer al Papa nuevu, cabezaleru de la ilesia católica y xefe d’estáu d’El Vaticanu, tres les ceremonies de despidida del pontífice arxentín. Un asturianu ta ente los cardenales dende 2023, cuando foi nomáu por Xicu. Va participar na escoyeta y podría amás ser escoyíu pol colexu cardenaliciu como Papa de la Ilesia Católica.
Trátase d’Ángel Fernández Artime (Gozón, 1960). El gozoniegu ye’l séptimu cardenal asturianu de la hestoria. Llicenciáu en Filosofía, Pedagoxía y Teoloxía Pastoral, dende 2014 ye’l rector mayor de la congregación salesiana y el 30 de setiembre del 2023 foi nomáu cardenal pol papa Francisco. Forma parte del Dicasteriu pa los Institutos de Vida Consagrada y les Sociedaes de Vida Apostólica de la curia romana dende ochobre del 2024. Ente otros cargos, foi director del colexu de la congregación n’Ourense y superior de la Inspectoría Arxentina Sur de los salesianos, en Bonos Aires. El presidente Adrián Barbón nomólu n’ochobre 2024 Fíu predilectu d’Asturies.
Fernández Artime tien a gala pertenecer a una familia que suma a lo menos cinco xeneraciones de pescadores. La rellación ente’l Papa y los pescadores tien raigaños bíblicos y simbólicos na tradición cristiana, especialmente nel catolicismu. Derívase de la figura de San Pedru, consideráu’l primer Papa, quien yera pescador enantes de ser llamáu por Xesús pa ser “pescador d’homes” (Matéu 4:19). Esti pasaxe simboliza la misión de la Ilesia d’empobinar a les persones escontra la fe y fai que dende va sieglos se faigan símiles ente los papes y los pescadores.
Con 64 años sedría, en casu de que seya señaláu nel Cónclave como cabezaleru de la ilesia, el primer papa asturianu na hestoria.
