La Dirección Xeneral de Consumu, dependiente de la Conseyería d’Ordenación del Territoriu, Urbanismu Vivienda y Derechos Ciudadanos, recibió con sorpresa’l pidimientu del Ministeriu de Tresportes y Movilidá Sostenible pa personase “como parte y persona interesada” nel espediente sancionador contra Aucalsa por caltener los precios habituales magar de les obres qu’enzanquen el tráficu nel Güerna.
La viceconseyera de Derechos Ciudadanos, Beatriz González Prieto, manifestó esti malestar de forma esplícita: «Tamos sorprendíos por esta solicitú. Nun tenemos mui claro si lo que pretenden ye rescatar a los asturianos o rescatar la empresa privada que xestiona l’autopista. Tamién llama enforma l’atención la falta de coordinación política ente alministraciones qu’incrementa, si cabo entá más, la sorpresa».
Nesti sentíu, alvirtió de la paradoxa que supondría que, en llugar d’avanzar escontra’l rescate del peaxe de l’autopista, la intervención del ministeriu tratara de protexer a la compañía concesionaria del propiu procedimientu sancionador.
Al respective de la tramitación de la solicitú de personación, el Serviciu de Consumu va estudiar la so procedencia y viabilidá llegal p’adoptar una decisión basada en criterios técnicos. “Vamos analizar el pidimientu, siempre so un criteriu técnicu y afechu a derechu”, precisó la viceconseyera.
González confía en que los intereses de la ciudadanía prevalezan sobre los d’una compañía privada que la so concesión foi prorrogada “de forma opaca por un Executivu del Partíu Popular” y que’l so peaxe foi declaráu illegal pola Comisión Europea n’abril del 2024.
