Convocada pa esta tarde una concentración de refugu pol asesinatu de Lorena Dacuña

El Conceyu declara trés díes de llutu oficial pol asesinatu de Lorena Dacuña

0
239
Ordenances fiscales pa 2020: IBI diferenciáu, xubíes d'agua y borrafes y bus más baratu

El Conceyu de Xixón declaró trés díes de llutu oficial na ciudá pol asesinatu por violencia de xéneru de Lorena Dacuña Fernández. Les banderes de la Casa Conceyu ondearán a mediu estil. El consistoriu xixonés, el Gobiernu del Principáu y la Delegación del Gobiernu n’Asturies manifestaron la so «enérxica condena» y la so «fonda consternación» por esti crimen que supunxo la primer víctima mortal de la violencia de xéneru n’Asturies anguaño. Les trés alministraciones convocaron una concentración a les 20 hores d’esta tarde na plaza Mayor de Xixón p’amosar les sos condolencias a familiares y amigos, y manifestar tamién el so refugu a esti asesinatu.

L’alcaldesa, Ana González, amosó’l máximu dolor énte una muerte «inxusta» porque «a Lorena quitáron-y so vida de manera infame contra tolos derechos». La primer edil llamentó que «ésta ye la dura realidá de les muyeres que tolos díes tenemos qu’enfrentanos a la violencia de xéneru pol simple fechu de qu’haya homes que crean que somos xuna propiedá a la que pueden hasta asesinar».

González visitó ayeri a familiares y amigos de Lorena Dacuña nel tanatoriu de Cabueñes. Treslladó-yos el so condolencias y les de tola ciudá, y pidió una participación masiva nel actu de denuncia, refugu y condena d’esti asesinatu.