La viceconseyera de Mediu Ambiente y Cambéu Climáticu, Nieves Roqueñí, inauguró güei’l cursu 2022-2023 de la Rede d’Escueles pol Reciclaxe del Consorciu pa la Xestión de les Borrafes Sólides n’Asturies (Coxersa), nel que van participar 60.992 estudiantes de 216 centros educativos allugaos en 50 conceyos.
Esta iniciativa, que forma parte del programa d’educación ambiental del consorciu, celébrase esti cursu sol lema Moda responsable, yá que pretende encetase como tema principal la prevención y la recuperación de les borrafes testiles. “El proyectu pretende xenerar ente les nueves xeneraciones concencia ambiental pa la compra y el consumu responsable, que ye la mayor garantía p’avanzar escontra una sociedá sostenible y circular”, esplicó la viceconseyera.
Roqueñí recordó que cola entrada a valir de la nueva llei de borrafes amontáronse los oxetivos de reciclaje y incorporáronse nueves esixencies pa les alministraciones públiques y la ciudadanía, como la obligatoriedá de que los conceyos pongan en marcha servicio de recoyida separada de ropa y calzáu usaos antes d’avientu de 2024. N’Asturies yá se recueye de forma dixebrada’l 14,8% de les borrafes testiles pa la so reutilización o reciclao.
Pela so parte, la xerente de Coxersa, Paz Orviz, valoró l’esfuerzu de los docentes pa desenvolver les iniciatives de la rede”, en que les sos actividaes d’educación ambiental participaron dos millones de persones nos postreros quince años. D’elles, 540.000 fueron estudiantes de 2.140 centros educativos y 140.000 visitaron el centru de tratamientu de borrafes de Serín.
Tamién participó na inauguración la directora xeneral de Planificación Educativa, Elena Arango, quien destacó’l compromisu de la comunidá educativa y la cooperación que caltien con Coxersa dende fai 16 años, cuando empezó’l proyectu de la Rede d’Escueles pol Reciclaxe.
Nel actu reconocióse a los centros educativos que recibieron el cursu pasáu les acreditaciones a los meyores niveles de desempeñu dientro de la rede. Asina, concedióse la Triple Erre a los colexos públicos Dolores Medio (Uviéu), El Bosquín (Samartín del Rei Aurelio), Padre Galu (Valdés) y Vega de Guceo (Mieres), según a la Escuela d’Educación Infantil Gloria Fuertes (Xixón).
La distinción máxima, la Cuarta Erre, otorgóse al Centru Integral de Formación Profesional d’Hostelería y Turismu de Xixón, pola implicación de tola comunidá educativa na formación en materia de sostenibilidá de los futuros profesionales del sector y l’aplicación efectiva de bones práctiques nel funcionamientu cotidianu del centru.
