Les obres del pozu de tormenes del Parque Inglés o Parque Hermanos Castro van rematar n’ochobre, acordies colo espresao pol Conceyu de Xixón güei. «El ritmu d’execución cumple colos plazos previstos, pudiendo entrar el depósitu en funcionamientu enantes de setiembre, una y bones los últimos trabayos a realizar son cuestiones que nun afecten a la puesta en serviciu del mesmu como la urbanización de la zona», declararon los responsables de la obra.
L’Alcaldesa de Xixón, Ana González, visitó ayeri los trabayos, centraos agora na construcción de la estructura del pozu. González destacó la importancia d’esta obra d’inxeniería que va dexar llevar a estaya un tratamientu integral del ciclu del agua na ciudá. Señaló, amás, qu’esti equipamientu supón una meyora pa poner solución, non solo a los problemes de contaminación, tamién a les llenes derivaes de les condiciones meteorolóxiques.
El Xerente de la Empresa Municipal d’Agües, Pedro Menéndez, esplicó qu’esti depósitu va almacenar les agües pluviales, con una capacidá de 15.000 metros cúbicos d’agua, lo que va amenorgar el númberu d’alivios que se producen nel cursu baxu del Ríu Piles. Coles mesmes, l’agua de los alivios que se xeneren van ser menos contaminantes una y bones l’agua recoyida van ser trataes.
