La Conseyería de Cultura, Política Llingüística y Turismu publicó l’anunciu d’apertura de la llicitación de les obres de caltenimientu, caltenimientu y rehabilitación de la cubierta de la ilesia de La Llaboral con un presupuestu de 579.811 euros (IVA incluyíu) procedentes de los fondos europeos Next Generation dientro del Plan de Recuperación, Tresformamientu y Resiliencia del Gobiernu d’España.

El proyectu, tramitáu al traviés de la Sociedá Pública de Xestión, Promoción Turística y Cultural del Principáu, establez un plazu d’execución de cinco meses pa realizar la intervención. Les empreses comenenciudes van poder presentar les sos ufiertes hasta’l 10 de payares.

Les obres tienen como oxetu reparar los problemes de filtraciones que sufre la cubierta, la llinterna y los sos alcuentros, que provocaron un evidente deterioru na cúpula de la ilesia. La intervención prevista va consistir nel llevantáu de la cobertoria de cayuela pa saniar el faldón ya impermiabilizar la superficie de les cubiertes, xuntes y alcuentros. Darréu, va reteyase aprovechando toles pieces de cayuela que s’atopen en bon estáu.

Nel interior de la cúpula encetará’l saniáu y la llimpieza de los nervios de lladriyu y los mosaicos de la llinterna, según la recuperación o reposición de pintura nes plementeríes. El proyectu contempla tamién l’aplicación d’un tratamientu hidrofugante sobre los elementos pedreses de la llinterna, la sustitución de les carpinteríes esistentes y l’arreglu y protección de les barandielles.

Finalmente, van desenvolvese delles actuaciones pa facilitar y garantizar l’accesu a la cubierta en condiciones de seguridá y dexar los posteriores llabores de caltenimientu. D’esta miente, va rehabilitase y va impermiabilizar la escalera de formigón helicoidal que conduz a la cúpula.

El financiamientu de l’actuación va encarar con fondos europeos Next Generation del Plan de Recuperación, Tresformamientu y Resiliencia, qu’inclúi nel so componente 24 les acciones de revalorización de la industria cultural y, dientro d’elles, los proyectos que suponen midíes de caltenimientu, restauración y puesta en valor del patrimoniu cultural.