Cultura comprométese a completar l’ampliación de Belles Artes esta llexislatura

Piñán afirmó que se va trabayar pa llograr la especialidá docente pal asturianu

0
763

La Conseyería de Cultura, Política Llingüística y Turismu manifestó esti martes el compromisu del Principáu d’acometer a lo llargo d’esta llexislatura l’ampliación del Muséu de Belles Artes. Asina lo aseguró la titular del departamentu, Berta Piñán, quien compareció na Xunta Xeneral para esponer les principales llínees polítiques de la so conseyería para esta llexislatura.

L’anunciu respecto al Belles Artes ye unu de los más relevantes al respective de los grandes equipamientos culturales. Tamién nel mesmu capítulu, Piñán, que nun pudo espresase n’asturianu, aseguró que Cultura va afondar n’una mayor coordinación ente’l Muséu de Belles Artes, la Llaboral Centru d’Arte, el Centru Niemeyer y el Muséu Barjola, pa «afaer les sos funciones a la realidá artística asturiana».

La Conseyería va impulsar la modernización de les biblioteques públiques y un pactu social pola llectura

La promoción cultural ye otru de los oxetivos de la conseyería. Con esi propósitu, tien previstu llevar a cabu una serie de planes por árees qu’incluyan la collaboración d’axentes privaos y la busca activa de patrocinios esternos. De la mesma, anunció un proyectu de modernización de les biblioteques públiques y un pactu social pola llectura qu’incorpore alministraciones ya industries culturales.

Con respectu al teatru, va ellaborase un plan específicu que recupere l’espíritu del Circuitu de les Artes Escéniques y abrió la puerta a la collaboración de los profesionales. Piñán tamién se propón recuperar el circuitu d’artes plástiques ya impulsar la producción cinematográfica, sofitando a los ceadores y ampliando los espacios d’esposición pública.

Patrimoniu

La conseyera anunció que se van desenvolver dos de los documentos estratéxicos más relevantes nel caltenimientu y espardimientu del patrimoniu asturianu. Per una parte, van reactivase les midíes del Llibru Blanco del Camín de Santiago, con vistir puesta nel Añu Xacobéu de 2021, y, per otru llau, va ellaborase un plan de xestión pa implementar les llínees marcaes pol Llibru Blanco del Prerrománicu. Yá con respectu al patrimoniu etnográficu, aseguró que se ta trabayando nun plan de protección d’horros y paneres y nuna solución específica pa la defensa de los teitos.

Piñán aprovechó la comparecencia pa informar de que Patrimoniu dio cursu al informe del Ministeriu de Fomentu relativu a al Chao Samartín, en Grandas de Salime, “lo que va suponer un impulsu definitivu a los trabayos nesti xacimientu de tanta relevancia”.

Na so intervención, Piñán tamién se refirió a la política deportiva. Nesti apartáu, la conseyería va defender y va potenciar valores como la igualdá de xéneru, la integración, la cooperación y el xuegu llimpiu, nun proyectu nel que se va trabayar en collaboración con Salú y Educación. Una de les prioridaes va ser l’aprobación del proyectu de la Llei d’Actividá Física y Deporte, un nuevu marcu normativu que promueve los valores sociales, educativos, formativos, de salú y de solidaridá ya integración na sociedá.

Promoción turística

Tocantes a Turismu, la conseyera numberó los principios xenerales sobro los que pivotaran les iniciatives nesta competencia: sostenibilidá, desestacionalización, equilibriu ente territorios, urbanos y rurales, costeros o interiores, y la internacionalización de les marques.

La conseyera afirmó que se va fomentar la collaboración coles alministraciones locales y vanse a amontar les llínees d’ayudes a pymes turístiques pa enfrentar la modernización y remodelación de los establecimientos, especialmente na digitalización y nos aspeutos tecnolóxicos, de comercialización y d’eficiencia enerxética.

Nun horizonte más ampliu, y alliniáu cola estratexa de Turismo España 2030, afirmó que’l sector va reforzar con un programa basáu na sostenibilidá y en la implementación de la intelixencia turística y la digitalización. La conseyería va promover xuna gran alianza con tolos axentes implicaos nel sector, basada na participación y la cooperación.