La Conseyería de Cultura, Política Llingüística y Turismu empecipió’l trámite pa contratar la redacción del proyectu d’adecuación d’un albergue de pelegrinos nel monesteriu de San Pelayo, n’Uviéu. El nuevu equipamientu d’atención a caminantes va allugar na nala del complexu colindante cola cai del Águila y el xardín de los Reis.
El proyectu va contemplar l’adecuación d’una oficina de recepción a pelegrinos na primer planta, mientres que les zones comunes y les habitaciones pa pernoctar van distribuyise ente’l segundu y el tercer pisu. Tamién se plantega la instalación d’un ascensor pa garantizar l’accesibilidá de los espacios a tolos usuarios y visitantes.
Pa les dependencies del albergue, na segunda y tercer planta, ta previstu crear un pasu o galería cubierta qu’ocuparía la metá de la cruxía de la terraza sobre’l corredor de San Xuan. Esti nuevu espaciu sirviría como distribuidor d’accesu a les habitaciones. En dambos pisos habilitaríense zones pal usu compartíu de los güéspedes y aseos comunes. Les habitaciones van tar forníes con llaváu y tocador y van caltener el tamañu de la distribución orixinal, anque nun se refuga la posibilidá d’ampliales y ocupar parte del distribuidor esistente.
El proyectu d’adecuación del nuevu albergue nel conxuntu monásticu va garantizar la compatibilidá d’usos de los espacios pa respetar la privacidá y les normes de convivencia que repara la comunidá de relixoses. El plan va haber de tener en cuenta una propuesta que dexe la puesta en marcha del nuevu equipamientu ensin tresmanar les rutines y normes del conventu de clausura.
