La conseyera de Cultura, Política Llingüística y Turismu, Berta Piñán, va presidir esti xueves la gala d’entrega de los cinco premios lliterarios otorgaos esti añu pol Gobiernu asturianu. La convocatoria enmárcase na política de consolidación de la llingua asturiana como vehículu d’espresión lliteraria de primer orde. L’actu va tener llugar a les 19.00 hores nel salón d’actos del Muséu Arqueolóxicu d’Asturies, n’Uviéu.
El premiu Xosefa Xovellanos de Novela, na so 40 edición, recayó en Francisco Álvarez González, pola so obra Los xardinos de la lluna. El Xuan M.ª Acebal de Poesía, que cumple la so 25 edición, entrégase a Gonzalo González Barreñada, pol poemariu El llar n’orde. El premiu Máximo Fuertes Acevedo d’Ensayu, tamién na so 25 edición, va recibilu José Ángel Gayol, pol trabayu tituláu El silenciu invisible. Ruma Barbero foi’l ganador de la 11.ª edición del Alfonso Iglesias, cola obra gráfica Seltegu. A lo último, la compañía Factoría Norte ganó’l premiu Nel Amaro de teatru profesional, na so tercer edición, pol espectáculu Les rellaciones peligroses.
Na gala, los premiaos van recibir una pieza artística en reconocencia a la calidá de la so obra y la so significación como aportación a la creación lliteraria en llingua asturiana. La gala va cuntar amás cola actuación musical de Mario Bernardo y Cristina Gestido.
