La costera de la xarda pa la flota pesquera asturiana empezó esti llunes con una cuota de 1.750.000 quilos y la participación de 165 embarcaciones. La campaña del añu pasáu zarróse con 1.175.266 quilos pescaos, polo que la cantidá asignada de partida yá supón 575.734 más que’l total capturáu en 2019.
Esti aumentu débese, sobremanera, a la medra d’un 41% esperimentáu nel total almitible de captures (TAC). Esta decisión, que se realiza sobre la cuota global de stock de caballa, tómenla los Estaos Costeros de la Comisión de Pesquerías del Atlánticu Nordés (NEAFC) d’alcuerdu a informes científicos.
A la cantidá de 1.750.000 quilos asignaos a la flota pesquera asturiana, falta por sumar la parte que-y va corresponder a la rexón pola repartida de les cuotes adicionales provenientes de los intercambios ente especies (swaps), que se va conocer nes próximes selmanes y col que podríen superase los 2 millones de quilos.
