Los principales servicios d’autobuses nocherniegos, les conocíes como curuxes, tornen a cirular. Son los mesmos que se daben de manera regular el branu pasáu. El Consorciu de Tresportes d’Asturies (CTA) retoma esti tresporte públicu al empezar l’actividá nocherniega desque remató l’estáu d’alarma decretáu pola crisis sanitaria. Estos servicios especiales dan seguranza na movilidá nocherniega. Anguaño tresportaren 31.000 viaxeros hasta’l pasáu 14 de marzu, fecha na qu’entró en vigor l’estáu d’alarma, lo qu’obligó a suspender estes rutes.
Van ponese en funcionamientu les llinies que xunen Xixón con Uviéu, Avilés, Candás y Lluanco. Tamién van recuperase los servicios que conecten Uviéu con Avilés, les cuenques, La Pola Siero, Llanera, La Ribera, Morcín y Riosa. Amás, los autobuses circularán otra vuelta nes nueche de branu ente Avilés y Castrillón. Los horarios van ser los habituales y puen consultase na web del CTA.
Otru serviciu que recupera pasu ente pasu la normalidá ye’l tresporte públicu per carretera al aeropuertu d’Asturies. Dende esti miércoles el consorciu amplía la flota d’autobuses al aeródromu. Les frecuencies van afaese a la ufierta diaria de vuelos. Les páxines web del consorciu, d’Alsa y Aena van publicar diariamente los horarios, polo que s’aconseya confirmar 24 hores enantes del viaxe si hubo cambeos. Los autocares van realizar los percorríos habituales dende y hacia Castrillón, Avilés y Xixón. Tolos vehículos que circulen al aeropuertu tan adaptaos a persones con movilidá reducida.
