La conseyera d’Educación, Lydia Espina, asistió esta mañana en Zarréu (Degaña) a la inauguración de la escuelina Los Minerucos, que se convierte na docena de la nueva rede autonómica, pública y gratuita, y la segunda que constrúi directamente’l gobiernu dientro de la Fase 1.
Cola apertura d’esti centru educativu –que s’empecipia con una matrícula de seis menores de 3 años-, la rede pionera de les Escuelines/As Escolías suma yá 152 neños y neñes nos sos doce centros n’activu.
La conseyería reformó l’edificiu d’Infantil del mentáu CPEB p’afaelo a esti nuevu usu educativu. La obra p’habilitar una unidá axudicóse en 130.424 euros. La escuelina consta d’un aula con zona de descansu, aséu infantil y de personal, área de preparación d’alimentos, sala d’usos múltiples y sala de xuntes, ente otres dependencies. Dispón, amás, d’un patiu esterior de 92 metros cuadraos de superficie.
Lydia Espina esplicó l’impulsu qu’esti serviciu educativu públicu, autonómicu y gratuitu representa pa la zona rural. Describió los beneficios educativos pal alumnáu, p’afitar población y pa ufiertar a los sos habitantes les mesmes oportunidaes qu’en cualesquier otra localidá.
Inversiones nel suroccidente
La conseyera repasó tamién la situación educativa del primer ciclu d’Infantil nos cincos conceyos del suroccidente asturianu, que cunten na actualidá con 103 neños matriculaos nes sos escueles de 0 a 3 años.
En Cangas, esiste la escuelina municipal Los Gigantinos, con 4 unidaes completes y 16 en llista d’espera. La conseyería preve anguaño la construcción d’otra autonómica, dotada d’una unidá, nel CP Obanca dientro de la Fase 2 de la rede de les Escuelines/As Escolías.
En Tinéu funciona otra escuelina municipal de 3 unidaes y 10 en llista d’espera. Al igual qu’en Cangas, la conseyería proxecta la construcción d’otra escuelina autonómica d’una unidá nel CP El Pascón dientro de la Fase 2.
N’Ayande, el conceyu va construyir una escuelina d’una unidá cola subvención de fondos europeos del Mecanismu de Recuperación y Resiliencia (MRR) correspondiente a la convocatoria de 2024, na que’l conceyu recibió 58.054 euros. El centru va allugar na planta baxa de la escuela-llar asitiada na mesma parcela del CPEB de La Puela Ayande.
A lo último, nel conceyu de Ibias nun se preve nestos momentos nengún equipamientu pa esta etapa educativa. El so conceyu nun participó en nenguna de les trés convocatories de fondos MRR pa la creación de nueves places de 0 a 3 años.
