Denunciaos dos chigres por abrir con más meses de les permitíes

0
644

La Policía Local de Xixón intervino esti martes ente l’incumplimientu de les normes d’apertura de bares y cafeteríes. Los axentes denunciaron a primer hora de la tarde a dos establecimientos. El primeru d’ellos, asitiáu na cai Asturies, sacara delles meses del interior ensin tener permisu pa ocupar la vía pública. L’otru establecimientu denunciáu alcuéntrase na cai Linares Rivas. Los responsables del mesmu colocaran meses altes na zona de pasu de peatones y cinco meses na zona autorizada, una más pa las que tien permisu.

El Conceyu de Xixón autorizó la duplicación de la superficie de les terraces pa garantizar que nun se pierdan meses. Eso sí, condicionó esti fechu a que nos casos nos que l’aumentu de la terraza ocupe un escaparate o un portal, se cunte cola autorización del propietariu o de la comunidá. Los establecimientos nun van pagar nada por esta ampliación d’espaciu nin pola instalación de terraces esti añu.

Los axentes tamién intervinieron de madrugada nun bar de la cai Torcuato Fernández Miranda. Nel interior del local y cola puerta trancada alcontrábense delles persones consumiendo bebíes alcohóliques. Toes elles fueron propuestes pa sanción, incluyíu’l responsable del local. En total, la Policía Local denunció esti martes a 23 persones, 15 homes y 8 muyeres, la mayoría con edaes ente los 31 y los 50 años.