La campaña de Carmen Moriyón con recursos públicos pa defender la so decisión sobre’l Mundial escandaliza a la oposición. Foi la propia alcaldesa quien compartía una imaxe de la mesma nes redes sociales.
Carmen Eva Pérez Ordieres (PSOE): “Ye una campaña partidista que pretende tapar el discutiniu de nun optar a la candidatura del Mundial 2030”.
Los socialistes sollerten de que l’alcaldesa utilice una campaña institucional pa intentar que la ciudadanía nun cuestione una decisión so y del so partíu “Yá ta bien de rise de la ciudadanía, de rise de la oposición y de rise de los procedimientos”, afirma Pérez Ordieres
Dende’l PSOE esixen que Carmen Moriyón dexe d’utilizar el Conceyu al so antoxu y caltenga a la institución al marxe de la propaganda.
Pa los socialistes xixoneses “Carmen Moriyón utiliza los recursos públicos pa defender la so decisión personal y unillateral de nun optar a que Xixón seya sede del Mundial 2030”. Dende’l PSOE consideren que la campaña publicitaria sobre la candidatura trespasó toles llendes y namás intenta evitar que la ciudadanía cuestione l’arrenunciu del so partíu, Foro. “Ye una campaña partidista que pretende tapar el discutiniu de nun optar a la candidatura del Mundial 2030. Sustitúi l’alderique rigorosu que tán acometiendo otres ciudaes pola publicidá”, apunta la conceyala socialista Carmen Eva Pérez Ordieres.
“¿Qué foi primero? ¿La decisión de Carmen Moriyón, que comunicó de forma intempestiva, o la campaña publicitaria? ¿Yá la tenía encargada? ¿Por qué procedimientu s’encargó? ¿Qué espediente se llevó a cabu? ¿Qué conceyalía la encargó? ¿Cuánto dineru costó? ¿D’equí p’arriba toles decisiones que tome esti Gobiernu municipal y que puedan amenar un alderique lexítimu, van ser sofitaes por campañes de propaganda que pagamos toes y toos? ¿Hasta ónde podemos llegar?”, entruguen dende’l Grupu Municipal Socialista.
Coles mesmes, acordies coles opiniones fecbes por miembros de Foro y PP, señalen qu’esto demuestra que nun esiste alcuerdu ente los dos socios de gobiernu, y que “namás quixeron promover un beneficiu personal y non un beneficiu pa toes y tolos habitantes d’esta ciudá, oxetivu de la publicidá institucional”.
Otros colectivos tán yá tamién amosando’l so descontentu col usu de dineru públicu pa una campaña que col lema “Un Mundial es caro, ser mundial no tiene precio. #GijonEsMundial” busca xustificar la decisión de l’alcaldesa.
