El Valdesoto estrema los precios pa homes y muyeres na so campaña d’abonaos 2026/27. L’equipu de Siero prepara la nueva temporada con polémica dempués d’establecer un preciu de 40 € pa les socies, 15 € menos que los homes.
El Valdesoto C.F. espubliza la so campaña d’abonaos d’esti cursu 2026/27 con polémica. Nel so anunciu al traviés de les redes sociales oficiales del club y de la prensa escrita, l’equipu sierense estrema los precios pa homes y pa muyeres. Nel casu de les aficionaes, puen faese socies por 40 €, mientres que los homes tienen que pagar 55 € de cuota.
La campaña estrema tamién otros grupos de pagu, como’l plan pa neños, de 6 €; el familiar, de 70 € (camudó nestes selmanes baxando 10 €); el sub-22, de 20 €; el de collaboradores, por 30 €; y el plan mozu, de 10 €.
Sicasí, espierta entrugues la decisión de faer dos categoríes distintes pol xéneru. Anque pueda lleese como una manera d’animar a les muyeres a siguir la temporada del Valdesoto y tar presentes nel so campu de xuegu, Villarea, de manera regular, la verdá ye que resulta difícil xustificar a estes altures esta discriminación positiva pa les muyeres, que paez asumir qu’elles nun ven fútbol y necesiten un tratu distintu pa faelo.
Nel casu de l’afición del Valdesoto, les reacciones pregúntanse tamién pola diferencia más destacada nos precios. Toes elles apunten a esta mesma decisión, qu’algunos homes tildan d’inxusta pa ellos pol so preciu mayor.
El Valdesoto competirá esti añu na Primera Asturfútbol, onde lluchará pol ascensu a Tercera Federación, el quintu escalón del fútbol español. Queda por ver cómo-y responde la so afición dempués d’esta campaña d’abonaos.
