La Conseyería d’Educación abre hasta’l 28 d’abril el plazu de solicitú de sovenciones pal usu de llibros de testu, en réxime de préstamu, en centros educativos públicos pal cursu académicu 2023-2024. Les ayudes van destinaes a alumnáu de Primaria, Secundaria y Enseñanza Básica Obligatoria.
Esta convocatoria amonta la dotación económica un 50% respectu al exerciciu anterior. Asina, los presupuestos d’Asturies contemplen p’anguaño una partida de 2,62 millones frente a los 1,74 conseñaos en 2022.
Otra novedá ye que s’amonten los estragales de renta de les families pa poder aportar a les ayudes, a razón de 3.000 euros más per cada miembru del llar. Tomando como referencia l’añu 2021, los estragales de renta pa la unidá familiar son los siguientes:
· Families de dos miembros: 16.000 euros.
· Families de trés miembros: 24.000 euros.
· Families de cuatro miembros: 32.000 euros.
· Families de cinco miembros: 40.000 euros.
· Families de seis miembros: 48.000 euros.
· Families de siete miembros: 56.000 euros.
· Families d’ocho miembros: 64.000 euros.
A partir del octavu, van añedise 4.000 euros por cada nuevu miembru computable.
Nel casu del alumnáu con necesidá específica de sofitu educativu derivada de discapacidá o d’alta capacidá intelectual, l’estragal va amontar en 5.000 euros.
Coles mesmes, va aumentase, previa acreditación documental, en families numberoses legalmente reconocíes: categoría xeneral (3.000 euros) y categoría especial (5.000 euros).
Requisitos pa les ayudes
Los trés requisitos pa poder solicitar les ayudes son: tar matriculáu, o tenelo previstu, mientres el cursu 2023-2024 n’una enseñanza obligatoria d’un centru públicu, nun repitir cursu y quedar dientro de los estragales de renta espuestos enantes.
El valor estimáu de los llibros de testu que se van recibir en calidá de préstamu va ser de 105 euros per estudiante. Estes ayudes n’especie van conceder en réxime de concurrencia competitiva. Los llibros van axudicase n’orde inversu de magnitú de la renta per cápita de la familia solicitante.
La Conseyería d’Educación caltien esti sistema de xestión por aciu bancos de llibros entamaos pelos centros públicos. Esta modalidá busca favorecer el préstamu y la reutilización de los mesmos manuales. D’esta forma pretende ganase n’eficiencia y, coles mesmes, fomentar valores y actitúes d’usu responsable ente l’alumnáu.
