La Conseyería d’Educación unvió a los conceyos con escueles del primer ciclu d’Infantil (0 a 3 años) les instrucciones y el calendariu d’almisión y matriculación pal próximu cursu 2023-2024, qu’axusta los plazos a les peculiaridaes d’estos centros. El documentu inclúi como novedá la exención del pagu de matrícula a les families con ingresos inferiores a 42.000 euros y clarifica la organización de les llistes d’espera.
El periodu d’inscripción nes escueles pa menores de trés años establezse del 24 d’abril al 5 de mayu y la primer llista provisional va publicase’l 29 d’esi mesmu mes. El plazu de presentación d’allegamientos va estender hasta’l 1 de xunu. Los conceyos tienen de dar a conocer el llistáu definitivu’l 5 de xunu y la matrícula va poder formalizase hasta’l día 16.
El baremu de puntuación nun se modificó no referente a la situación llaboral de los padres o tutores, pero sí nos apartaos d’ingresos económicos. A partir d’agora, va empezar a utilizar como unidá de midida l’Indicador Públicu de Renta d’Efectos Múltiples (IPREM) vixente, en llugar del salariu mínimu interprofesional. Considérase como renta familiar la resultancia d’estremar ente catorce’l total de los rendimientos llograos pola unidá familiar mientres l’últimu añu de que se tengan datos fiscales.
Tocantes a la puntuación por composición familiar, les instrucciones nun rexistren cambeos, pero se clarifica el conceutu de familia monoparental.
En casu d’empate, l’almisión va realizase acordies con los siguientes criterios: númberu d’hermanos o hermanes matriculaos nel centru, mayor puntuación nel apartáu de situación llaboral de los padres y mayor puntuación nel apartáu d’ingresos económicos. Si l’empate caltiense, va resolver por aciu la ordenación alfabética de les solicitúes, acordies con la resultancia del sortéu realizáu’l 6 de marzu, qu’estableció les lletres GO como puntu de partida y el sentíu alfabéticu de l’A a la Z.
Les instrucciones inclúin una nueva redacción del apartáu de la llista d’almisión y les d’espera para esclariar meyor el so procesu d’ellaboración y evitar discutinios. El documentu establez un llistáu d’almitíos y otros trés más colos ensin almitir mayores de trés meses, colos menores de trés meses y colos pidimientos presentaos fuera de plazu.
Ayudes pa nueves places, hasta’l 3 d’abril
Mentanto, hasta’l día 3 d’abril va permanecer abierta la segunda convocatoria d’ayudes a los conceyos pa financiar infraestructures y equipamientos pa la creación de nueves places públiques de primer ciclu d’Infantil. Nesta nueva convocatoria -enmarcada nel Plan de Recuperación, Tresformamientu y Resiliencia de la Unión Europea- van partise 6,35 millones en réxime de concurrencia competitiva. El Conseyu de Gobiernu autorizó esta partida en febreru.
