La Conseyería d’Educación multiplicó esti cursu casi por nueve la cifra d’alumnáu de primer cursu de Primaria identificáu como d’altes capacidaes. De los 32 contabilizaos nel cursu anterior 2021/2022, pasóse a 280 estudiantes nel presente cursu, lo qu’alza’l porcentaxe del 0,5% al 4,2% del total matriculáu.
Esta cifra asitia a Asturies a la cabeza nacional, que la so media de detección en 1º de Primaria, colos datos zarraos del cursu pasáu, yera de solo’l 0,2%. Nenguna comunidá autónoma algamó’l 0,6%, según los datos estadísticos publicaos pol Ministeriu d’Educación y FP.
Esa crecedera na detección débese a la estratexa que la conseyería punxo en marcha nesti cursu. Esta iniciativa pionera sirvió p’analizar por aciu un cuestionariu inicial al 95% del alumnáu de 1º de Primaria. Esi analís previu escoyó a 637 escolares que se sometieron a una posterior valoración sicopedagóxica.
D’esos 280 escolares identificaos agora como d’altes capacidaes, 256 llográronse gracies a esta estratexa (el 91%), mientres que los 24 restantes llográronse polos procedimientos ordinarios.
La estratexa tamién sirvió pa permediar la detección por sexos, yá que s’alcontraben munchos menos casos ente alumnes. De los 280, 134 son muyeres. Esto representa prácticamente la metá (el 48%). El cursu pasáu solo representaben unu de cada cuatro estudiantes.
La titular d’Educación, Lydia Espina, calificó como “ésitu atayante” les resultancies d’esta iniciativa pola que’l Principáu yá recibió una distinción en septiembre. La conseyera considera que los centros d’enseñanza y el profesoráu disponen agora de “una información bien pervalible” de cara a ufiertar una respuesta educativa que garantice’l máximu desenvolvimientu de les sos potencialidaes.
Espina consideró tamién positivu que les alumnes algamaren una proporción similar a la de los alumnos, lo que entronca colos oxetivos de la educación n’igualdá o coeducación, que ye otra de les pilastres del so departamentu. La estratexa reveló que nun resulta fácil detectar a les neñes colos procedimientos ordinarios.
La planificación
La estratexa de detección d’altes capacidaes empezó nel primer trimestre del cursu cola repartida de 6.297 cuestionarios, que fueron rellenaos polos tutores de 273 centros escolares públicos y alcordaos. Esos test determinaron qu’había 637 estudiantes con nicios abondos pa ser sometíos a la mentada evaluación sicopedagóxica. Otros 308 presentaron delles característiques pero non les suficientes como pa siguir col procedimientu.
Los 280 confirmaos agora con altes capacidaes pasen a rexistrase como alumnáu de necesidaes específiques de sofitu educativu (NEAE) y van poder aportar a dalguna de les trés midíes que’l sistema educativu asturianu yá tien establecíes: arriquecimientu curricular, ampliación de conteníos y flexibilización.
Hai un segundu bloque d’alumnáu que va quedar en siguimientu polos sos tutores y orientadores y qu’antes de concluyir la etapa de Primaria va ser sometíu a un nuevu analís. Son los 308 qu’espuntaron nel primer test pero ensin nicios abondos y tamién los 357 que nun quedaron confirmaos cola evaluación sicopedagóxica. En total, 665.
