El nuevu informe del estáu del enseñu nel mundiu sofita’l modelu de la educación por competencies pal algame d’un mundiu más cooperativu. Releva al Informe Delors y entra en vigor esti cursu cola Lomloe.
Trátase de retrucar a por qué se deprende y d’un mou adaptáu a l’actualidá. Col envís de que la educación dea forma al mundiu que se nagua socialmente pa les vinientes trés décades. Poro, inclúise’l cambéu climáticu y les nueves teunoloxíes nel currículu.
Énte la desigualdá que xorrez tres la pandemia plantega delles propuestes. D’esta miente apúntense delles como’l deprendimientu interdisciplinariu, les escueles inclusives, oportunidaes educatives a lo llargu de tola vida acullá de la escuela y afitar el rol relevante del profesoráu.
La UNESCO fai un apueste pola pedagoxía de la cooperación énte’l modelu clásicu de la competitividá. Quier un diálogu dende l’entamu ente’l profesoráu, los escolinos, los gobiernos y tola sociedá.
D’esta miente, búscase’l desendolcu integral del escolín, o seya, saber conocer, saber facer y saber ser. Con estratexes qu’afonden na creatividá, na iniciativa, nel pensamientu críticu y na capacidá d’afrontar un problema evaluando’l riesgu de la solución aplicada.
La ONX fizo un cume mundial en setiembre sobre educación p’anovar estes llinies educatives, que se fai como un cambéu del paradigma educativu global. L’enfotu ye educar pa saber ser, vivir y tar nel mundiu nel que s’alita. Asina, dexar atrás la educación por conteníos pa memorizar, pa entamar la educación por competencies válides pa iguar los problemes de la vida.
