La Conseyería d’Educación propunxo que’l Colexu Patronato San José acueya a tol alumnáu del Colexu San Vicente de Paúl, que nun pudo volver a entamar l’actividá llectiva presencial, dempués de qu’el 5 de xineru l’edificiu sufriera daños na so estructura. Técnicos de la conseyería acompañaos pola dirección, la propiedá y la titularidá de dambos centros xixoneses, visitaron yá les instalaciones y comprobaron les posibilidaes del inmueble.
La propuesta consiste n’aprovechar un total de 18 aules disponibles y acondicionar otros espacios alternativos, como la biblioteca o la sala que s’utiliza como ximnasiu de los primeros cursos de Primaria. Amás, el Patronatu San José dispón de marxe abondo nel esterior pa instalar les aules modulares necesaries p’allugar al alumnáu que nun cunte con sitiu dientro del edificiu principal.
Esta solución escepcional rique de la firma previa d’un alcuerdu priváu ente los centros educativos, que tienen alcordaes les enseñances d’Infantil, Primaria y Secundaria. Dambos edificios pertenecen a la Congregación de les Fíes de la Caridá, anque la titularidá del San Vicente correspuende a la Fundación Educere.
Pela so parte, la Conseyería d’Educación, col enfotu de protexer los derechos del alumnáu escolarizáu nel Colexu San Vicente de Paúl, yá empecipió d’oficiu’l procedimientu pa dictar una autorización provisional, hasta final de cursu, qu’habilite esta nueva organización. Agora, la titularidá del centru va poder alegar cuál ye la situación y solicitar el treslláu temporal al Colexo Patronato San José.
