La Conseyería d’Educación publicó en Educastur la primer convocatoria de places p’aspirantes a interinidá del nuevu cursu escolar (2026-2027), con una ufierta de 3.290 puestos, 440 más que l’añu pasáu. La convocatoria, qu’inclúi 1.772 places pa Secundaria y otros cuerpos docentes y 1.518 pa Primaria, va dexar cubrir vacantes estructurales y necesidaes de los centros al entamu del añu académicu.
Nesti primer llistáu incorporáronse les vacantes esistentes n’enseñances artístiques, la mayoría de les comisiones de serviciu aprobaes y les places xeneraes por equipos directivos, lliberaciones sindicales o sustituciones de personal en situación de servicios especiales.
La ufierta tamién inclúi 19 places de dirección pa la rede pública, autonómica y gratuita de Les Escuelines/As Escolías, asina como puestos destinaos a los distintos programes d’inclusión educativa: aules abiertes en centros ordinarios, aules d’inmersión llingüística, aules hospitalaries, la unidá escolar del hospital de día infanto-xuvenil y l’equipu mistu del conveniu cola ONCE.
Coles mesmes, incorporáronse places pa sustituyir al personal responsable de los programes de cooperación territorial PROA FSE y Educación Inclusiva FSE , financiaos con fondos europeos.
La convocatoria contempla, amás, puestos pa reemplazar a los que van xestionar los programes de cooperación financiaos pol Ministeriu d’Educación, Formación Profesional y Deportes destinaos al refuerzu de les competencies matemática y llectora, bienestar y protección y educación inclusiva.
Un total de 25.789 persones fueron convocaes pa participar nel procesu, 7.934 más que na convocatoria del pasáu cursu. Les solicitúes van poder presentase hasta les 23:59 hores del próximu vienres, 21 d’agostu, y l’axudicación publicará’l miércoles 26.
La conseyería yá trabaya na segunda convocatoria, prevista pal 9 de setiembre, que va incluyir les places derivaes de reducciones de xornada y baxes llaborales. L’axudicación realizará’l 11 de setiembre y la fecha d’incorporación a los centros va comunicase darréu.
