La Conseyería d’Educación publicó ayeri nel portal institucional Educastur la segunda convocatoria de places p’aspirantes a interinidá del nuevu cursu escolar. La ufierta compónse de 903 puestos, 174 más que na convocatoria de setiembre del añu pasáu. Del total de places, 445 destínense al cuerpu de maestros y 458 a Secundaria y otres enseñances.
La Dirección Xeneral de Personal Docente convocó a 14.005 aspirantes, que puen formular los sos pidimientos dende güei y hasta’l vienres, a les ocho de la mañana. Esi mesmu día realizarán les axudicaciones de destín. La firma ta programada pa les tardes del llunes 14 de setiembre y el martes 15, según les instrucciones y avisos que se van publicar en Educastur. A lo último, la incorporación a los centros d’enseñanza va ser el llunes 14.
En cuanto al perfil de places, hai puestos derivaos de reducciones de xornada, comisiones de serviciu, profesoráu de Relixón, vacantes por aumentu de necesidaes, cargos directivos, escedencies y baxes llaborales.
Les dos primeres convocatories del nuevu cursu sumen un total de 4.193 puestos, 614 más que l’añu anterior. D’ellos, 1.963 son del cuerpu de maestros -325 más qu’en 2025- y 2.230 de Secundaria y otres enseñances, 289 más que’l cursu anterior.
